TRIPELA Society of Divine Word (SVD) seminarien (bruda) i kisim odinesen bilong kamap diakon long St Peter Chanel sios, Erima long Nesenel Kapital Distrik long las wik Sarere.

Dispela ol bruda em Jerry Kurai bilong Wabag Daiosis (Enga), Jeremiah Kaumbai bilong Wewak Daiosis (Is Sepik) na Herman Kunow bilong Madang Asdaiosis.

Sir John Kardinal Ribat i givim dispela odinesen long ol.

Arere long famili na planti ol arapela lain husat i kamap long lukim odinesen em ol lain bilong SVD yet, Pater Rector long SVD koles long Bomana na ol tisa long Katolik Tiolojikal Institut (CTI), Bomana.

Het tok bilong dispela lotu em “Yu salim mi go,” Aisaia 6:8.

Kardinal Ribat i givim skul bihainim Gutnius bilong Santu Luk 5:1-11 “….Yu no ken pret. Nau yu wok long kisim pis, tasol bihain bai yu wok long kisim ol manmeri i kam long mi.”

Long dispela Kardinal Ribat i tok ol i kisim strong pinis na ol nau i stap help man bilong ol pater.

Em i tokim ol diakon olsem ol i mas “Tis long wanem samting ol i rit, rit long wanem samting ol bilip na bilip long wanem tok ol i tis.”

Em i tokim ol olsem ol i no inap long gat samting bilong ol yet, ol i mas harim tok bilong Superia na Bisop bilong ol na ol i no ken marit.

Ol i no kisim blesing long go pas long kosekresen, mekim holi bret na wain olse bodi na blut bilong Jisas tasol i ken pre wantaim pater long dispela lotu.

Ol diakon bai stap wanpela yia, na wantaim tok orait long ol supavaisa na luksave bilong SVD superia, ol diakon bai kisim odinesen bilong kamap pater.

Bihain long las wik odinesen, Diakon Jerry bai go long kantri Chad long Afrika, Diakon Jeremiah bai go long Jemeni (Yurop) na Diakon Herman bai stap long Madang Asdaiosis.