GLORI na ona i mas go long God long olgeta wok, Dokta Maxon Mani bilong Kristen Lida Trening Koles i tok.

Em i tok hevi i kamap taim man i mekim wok long litimapim nem bilong em yet.

Dokta Mani husat i ges spika i mekim dispela tok long ol 49 seminerien i greduet long Katolik Tiolojikal Trening Institut long Bomana, ausait long Pot Mosbi long 14 Novemba.

Het tok bilong greduesen em “Put out into the Deep,” o i ken min tu olsem Putim long ples nating.

Bisop Otto Separy bilong Bereina Daiosis, i bin stap tu long dispela seremoni.

Dokta Mani i bihainim rit long Gutnius bilong Metyu 4: 1-7 we i tok long Satan i traim Jisas. “Long dispela taim Holi Spirit i bringim Jisas i go long ples i no gat man, bai Satan i traim em….”

Dokta Mani i tokim ol seminarien olsem wankain olsem Jisas i go long ples i no gatman, ol nau i go long ples nating long Satan i traim ol.

Em i tok i no gat wanpela banis i stap long banisim ol long ol i stap gut o nogat.

Em i tok maski ol i stap namel long planti manmeri, namba wan samting em Bikpela i mas stap pas long laip bilong ol.

Em i tok long pre na long wok,  ol bai lukluk long Bikpela na givim biknem long em.

Em i tok wantaim Jisas Krais na Holi Spirit ol i inap daunim ol traim.

“Long olgeta disisen yupela i mekim, i gat wanpela askim, biknem i go long God Papa o no gat?’ Dokta Mani i tok.

“Sapos biknem i go long God orait dispela em i inapim singaut bilong yupela long kamap wok man bilong God.”

Dokta Mani i tok skul ol i kisim pinis na dispela i stat bilong longpela wokabaut.

Em i tok ol kisim ol gutpela skul na nau em i taim bilong karimaut dispela ol skul na givim biknem long Bikpela.

Ol sumatin i greduet wantaim Diploma long Filosofi na Tioloji na Betsela Digri long Filosofi na Tioloji.

Ol sumatin husat i pinisim tripela yia bai mekim pastoral wok na bihain go bek na pinisim narapela foapela yia.

Ol sumatin husat i pinisim 7-pela yia olgeta na wantaim blesing bilong bisop bilong ol na ol superia bai kisim odinesen na kamap pater.

Emmanuel Dian bilong Wabag Daiosis husat i greduet wantaim Betsela Digri long Tioloji i tok: “Mi bin wok hat long pinisim skul, sampela taim mi no save slip gut tasol dispela nau i pinis na mi amamas.

“Wantaim strong bilong God na stia bilong ol tisa, mi kamap long dispela mak.”

Rosemary Yambune i raitim