LONG Sande 15 Novemba, Bisop Darius Kaluza i kisim sia bilong em olsem bisop bilong Bogenvil Daiosis.

Apostolik Nuniso Asbisop Mathew Vayalunkal, mausman bilong Vatikan i bin go pas long lotu long lukim Bisop Darius i kisim sia.

Sir John Kardinal Ribat, MSC; Asbisop Douglas Young, SVD, bilong Mt Hagen Asdaiosis; Bisop Rosario Menezes, Monfort,  bilong Lae Daiosis; Emeritus Bisop Francesco Panfilo bilong Rabaul Asdaiosis, SDB; Presiden bilong Atonomus Rijon bilong Bogenvil, Ishmael Toroama na ol Memba bilong Bogenvil Gavman i bin stap tu long dispela seremoni.

Planti manmeri i bin kamap long Hahela, Buka long lukim tu nupela bisop.

Asbisop Vayalunkal i amamas na tok tenkyu long Bisop Darius long tok orait long kamap bilong Bogenvil.

“Taim yu mekim wok long givim skul na mekim holi ol bilip manmeri, mipela i pre olsem Holi Spirit bai helpim yu long skulim ol manmeri long sanap strong long bilip bilong ol long God na tok bilong em,” em i tok.

“Yu nau i makim sios long rijon na olsem wok i stap long han bilong yu.

“Yu bai lukim sios i stap strong na ol manmeri i gat bilip.”

Long wankain taim, Emeritus Asbisop Francesco Panfilo i tok wok na bilip bilong Bisop Darius i ken helpim long wok gut long nupela ples wantaim ol pipel.

“Mi bilip olsem yu laki long kamap bisop bilong Bogenvil bikos spirit na strong bilong yu i ken helpim yu long wok gut,” em i tok.

“Mi save ol manmeri i redi long wok wantaim yu.”

Presiden Toroama i amamas na tok welkam long Bisop Darius na tok rijon i redi long wok wantaim em long strongim bilip bilong ol manmeri.

“Tude i makim wanpela spesel de long Katolik Sios long Bogenvil,” em i tok.

“Kamap bilong bisop i stat bilong ol manmeri i ken wok bung wantaim na kamapim bel isi long rijon.”

Bisop Darius i tok em i amamas long go long Bogenvil na i tok tenkyu long gutpela welkam em i kisim.

“Mi yet i no inap mekim wok gut tasol wantaim sapot na prea bilong yupela, mi ken wok gut,” em i tok.

“Yumi olgeta i mas wok long strongim Kingdom bilong God long rijon.”

Pastaim long Bisop Darius i go long Bogenvil, em i bin stap Bisop bilong Goroka Daiosis long foapela yia.

Pop Francis i bin makim Bisop Darius long Septemba long kamap bisop bilong Bogenvil.

Dispela em bihain long dai bilong Bisop Bernard Unabali long Ogas las yia.

Bisop bilong Rabaul Asdaiosis i save lukautim Bogenvil Daiosis inap long dispela taim em Bisop Darius i kisim ples.

Bisop Darius i bilong kantri Poland.

Abigail Seta i raitim