Olsem tasol, yupela marit meri, yupela i mas aninit long man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i tanim bel. 1 Pita 3:1

Wanpela pasto i go autim tok bilong God long wanpela taun. Wanpela taim lotu i pinis na wanpela meri i kam lukim em. Pasto i tokim em long Jisas i bin dai long olgeta sin na pasin nogut bilong em. Meri i tanim bel tru na i bilip long bikpela wok Jisas i bin mekim bilong baim bek em.

Bikpela amamas na bel isi i pulamapim bel bilong em, tasol wanpela wari i stap yet long bel bilong em. Em i askim pasto, “Mi mas mekim wanem sapos mi go long haus, bikos man bilong mi i strongpela man tru. Sapos mi tokim em long mi kamap Kristen pinis, em bai i paitim mi no gut tru. Na mi ting olsem em bai kilim mi dai.”

Pasto i bekim, “Sapos nau yu go long haus yu mas tokim em olsem yu tanim bel pinis. Yu mas go na mekim gutpela pasin tru long em. Taim em i kam long haus, yu mas smail wantaim na hariap i go holimpas na givim kis long em na askim em i stap olsem wanem. Yu mas kukim gutpela kaikai long em na oltaim yu givim bel tru long em na mekim gut long em.”

Meri i go bek long haus na bihainim tok bilong pasto. I no longtaim liklik na man i askim em, “wanem samting i kamap long yu? Bipo oltaim yu save krosim mi na mekim no gut long mi na paitim mi?” Meri i bekim isi na i tok, “Sapos mi tokim yu long wanem samting i bin senisim mi, ating bai yu paitim mi.”

“Olsem wanem?” man i askim. “Bai mi paitim yu long ol dispela gutpela pasin yu save mekim long mi ah? Nogat tru.”

 Meri i askim man bilong em, “Yu mas mekim wanpela promis long mi olsem bai yu no inap paitim mi.”

Man nau i bekim, “Yes mi no inap paitim yu.”

Nau meri i stori olsem wanem Jisas i bin senisim olpela pasin bilong em i go long nupela pasin olsem Baibel i tok .

Olsem na sapos wanpela man o meri i pas wantaim Krais, orait God i mekim em i kamap nupela man o meri tru. Harim gut, nau olpela pasin i pinis olgeta, na nupela pasin i kamap pinis. 2 Korin 5:17

Nau man bilong em i bekim, “ Mi tu mi laik kisim dispela nupela laip”

Gutpela pasin bilong meri tasol i bin opim rot bilong man i senisim pasin na tanim bel na kisim Jisas. Em i olsem Baibel i tok pinis. 1 Pita 3:1.