TUPELA wik i go pinis bihain long moning Lotu o moning Misa long St. Mary’s Peris long Goroka, wanpela yangpela papa i kam long mi.

Em i tokim mi nem bilong em na em i wanpela Tisa i tis long Lufa Distrik insait long Isten Hailans.

Em i tokaut long wari na hevi bilong em. Olsem em i wanpela Katolik man i kam long Katolik famili.

 Em i kamap tisa na nau em i tis long gavman skul. Dispela ples em i stap long en, i no gat wanpela haus lotu bilong Katolik i stap. Olgeta em i bilong narapela lotu.

Long Sande, em wantaim het masta bilong skul, em i tu Katolik, wan wan taim ol i save bung na wokim prea, ritim Baibel na pinis wantaim prea Korona.

Em i tok olsem em i hangre tru long kisim Jisas long Santu Komunio. Tasol em i tokim mi olsem em i marit na i gat tripela pikinini pinis.

Em i askim mi olsem, bai i gat rot bilong helpim mi long wokim kofensio na kisim Komunio o nogat?

Bihain long harim wari bilong em, mi mekim wanpela tok piksa long helpim em olsem olgeta wari na hevi yumi karim long dispela laip, i gat rot bilong stretim. Na mi askim em long lukluk long wara i ran long baret na askim em long lainim pasin bilong wara.

Wara i save ran, tasol long sampela hap, wara bai bungim sampela diwai o ston long pasim rot bilong em.

Wara i no stop. NOGAT! Em i bai bung i stap long dispela hap na sapos i pulap, em i bai painim rot bilong abrusim samting i pasim em. Sapos em i painim rot pinis, em i bai ran i go yet.

Olsem tasol laip bilong yumi. i gat kain kain hevi na wari i save kamap long yumi. Ol i olsem dispela diwai o ston i stap long rot bilong wara. Wari na hevi i traim long pasim yumi long go moa. Tasol olsem wara, yumi no ken stop na givap. NOGAT! Yumi mas muv na painim rot bilong abrusim ol hevi na wari bilong yumi.

Bihain long mekim tok piksa long em, mi tokim dispela yangpela man olsem, hevi na wari bilong yu i kam tasol ol i bai i no inap stap insait long yu. Yu bungim pinis, nau em i taim bilong painim rot bilong abrusim dispela hevi na wari.

Yu save, wanem kain hevi na wari bilong yu. Wanpela samting i pasim yu i no kisim Komunio, bikos yu tis long ples i no gat Katolik hasu lotu i stap long en. Tasol wan wan taim yu save kamaut long dispela ples tu. Em i givim sans long yu long bihainim lotu Katolik wantaim narapela Katolik manmeri long peris bilong yu.

Namba tu samting i pasim yu, bikos yu no kisim Sakramen bilong Marit, blesim marit bilong yu long haus lotu yet.

Bihain mipela i wokim plen bilong helpim tupela marit na kisim blesing na bihain tupela i kisim Komunio. Olsem na mi tokim em, taim mi kam bek long Madang pinis, yu kam wantaim meri bilong yu na mi bai helpim yutupela, o redim yutupela long kisim Sakramen bilong Marit na Sakramen bilong Yukaris o Santu Komunio.

Em i amamas na i go wantaim promis bai em i kam bek gen wantaim meri bilong em.

*: Tingim gut! Wari na hevi yumi bungim, em i no kilim yumi

*: Olgeta wari na hevi i gat rot bilong em long stretim. Em i stap long han bilong yumi wan wan.

Fr. Paul Liwun SVD