KARDINAL John Ribat, Asbisop bilong Pot Mosbi Asdaiosis i askim askim ol Kristen manmeri long kamapim gutpela sosaiti long bihainim tok bilong Jisas.

Em i tok em i wok bilong ol papamama, tisa, pablik sevan na ol yangpela wantaim ol pater na ol relijus olsem ol bruda na sista long olgeta i wok wantaim olsem komyuniti na sosaiti bilong yumi i ken stap gut.

Em i tok kamapim gutpela bel isi sindaun i wok Bikpela Jisas Krais i statim.

Kardinal Ribat i mekim dispela tok long bihainim ol toktok em i save kamapim long wan wan mun.

Em i tok dispela i taim bilong traim na olsem yumi i mas stap wantaim ol famili bilong yumi.

“Kamapim ol woksop we bai helpim ol papamama na luksave long ol kain senis i kamap long sosaiti we dispela i ken helpim ol tu wantaim strong long rot bilong bungim ol salens i kamap,” em i tok.

“Arere long hevi bilong pandemic - coronavirus (COVID-19), planti samting nau i kamap i soim mak bilong ol manmeri i laikim sekyuriti, amamas na bel isi.”

Kardinal Ribat i tok sampela manmeri i mekim ol samting we inap bagarapim laip olsem stil, kisim graun nating nating, kilim man na planti arapela moa hevi long ol i ken stap.

Em i tok i gat bikpela hevi bilong vailens bikos planti i no lukim mining bilong laip.

“Yumi olgeta i laik kamap gut na olsem yumi i mas wok bung olsem bel isi i kamap.

“Pasin bilong skulim ol pikinini gut i no moa save kamap.

“Ol pikinini na ol yangpela i mekim ol pasin nogut we ol i ting ol bai painim mining na amamas long laip bilong ol.

 “Em i wok bilong wan wan manmeri, famili na sosaiti long wok tru long lewa bilong yumi olsem ol pikinini i lukim bel isi, sekyuriti na amamas.

 “Ol i bihainim ol toktok i stap long sosel midia moa long ol i harim toktok na bihainim papamama na ol bikpela manmeri.”

Kardinal John i tok vailens na no gat rispek long famili na komyuniti, i wok long kamap bikpela.

Em i tok long pas bilong em, Fratelli tutti, we i promotim yunivesal tingting bilong kamapim poroman pasin na sosel prensip, Pop Francis i tok taim i kamap pinis long ol manmeri  i ken driman long lukim manmeri i stap wanpela famili, we “yumi i brata na susa.”

Em i tok Jisas i pre long bel isi na yuniti i mas kamap olsem tok i stap long Baibel rit:  “Mi laik bai dispela olgeta man i ken i stap wanbel, olsem yu Papa, yu stap long mi na mi stap long yu. Olsem tasol mi laik bai ol i ken i stap long mitupela, na bai ol manmeri bilong graun i ken bilip long olsem yu bin salim mi na mi kam,” Jon 17: 21.

“Mi laik lusim yupela, na mi givim bel isi long yupela bai em i ken i stap long yupela. Bel isi bilong mi, em mi givim long yupela. Na bel isi mi givim long yupela, em i no wankain olsem ol manmeri bilong graun i save givim. Olsem na yupela i no ken bel hevi na tingting planti, na yupela i no ken pret,” Jon 14: 27.

Kardinal i pre na hop olsem yumi olgeta i kisim bel isi Jisas i laik givim long yumi na yuniti yumi i gat bihainim bilip yumi i gat long Papa, Jisas na Holi Spirit.

Paul Zuvani i raitim