LAE Ridima Sios bilong Ivanjelikal Luteran Sios (ELC) bilong Papua Niugini i lukim 116 manmeri i kisim Sakramen bilong Baptais na Konfemesen.

Presiden bilong Lae Siti Seket, Reveren Baafekec Bamirinuc i bin go pas long lotu.

Pasto bilong Ridima Peris Reveren Jonathan Aiange wantaim helpim bilong peris kaunsil i redim ol kendidet long kisim ol sakramen.

Pasto Hans Giegere bilong ELC het opis na Pasto Chris Yalut na Pasto Chris Molo bilong Siassi i helpim tu long redim ol manmeri long baptais.

Ridima peris presiden Paul Noro, Vais Siaman James Sipa, Seketeri Kotua Beul na peris hetmeri Celine Brian wantaim Peter Molo, Sari Kelly, Bosing Ema i redim ol kendidet long kisim Sakramen bilong Baptais na Konfemesen.

Zaacheus na Ramon Ministri grup i bin go pas long prosesio.

Ol sumatin bilong Immanuel Luteran Skul i go pas long ol bilas na liteji.

Pasto Giegere i tok God Bikpela yet i strongim bilip bilong ol manmeri long mekim wok.

Olsem tasol em bai go pas long dispela ol nupela manmeri long bilip bilong ol.

Em i tok ol i mas luksave na bihainim gut ol lo na tok bilong God.

Em i tok nau olsem ol i kamap olsem pikinini bilong God, oltaim ol i mas soim dispela bilip long tok na pasin bilong ol.

Em i tok wantaim Sakramen bilong Konfemesen, Holi Spirit bai go pas na strongim ol long sanap strong na abrusim ol kain kain traim i kamap long laip bilong ol.

Ol kendidet i kisim tu Holi Komunio long dispela lotu.

Jerry Daniels i raitim