Martin Luther seminari long Lae bai holim namba 48 greduesen bilong ol long dispela wik Sande.

Dispela greduesen bai i gat 14 seminari i kisim Diploma pepa na 4-pela bai kisim Baibel Tioloji na 2-pela i kisim spesel kos. Olgeta bai greduet wantaim we ol famili bilong ol bai kam long Enga na Niugini Ailan provins long lukim dispela sepsel de bilong pikinini bilong ol.

Dean  bilong Seminari Stadi, Reveran Samson Koi i tok man husat bai go pas long autim tok bilong God em Reveran Hans Gegere wokman bilong Trening Dipatmen na Dairekta bilong ELC PNG sios.

Em i tok olgeta famili bilong ol Treni Pasto bai kam long Simbu, Hagen, Madang na Morobe provins yet long lukim dispela greduesen de.

Em tok long wankain taim Praim Minista bilong PNG James Marape tu bai kamap olsem Gest Spika long lukim na givim sampela stia toktok long laip bilong ol Kristen na bilip manmeri.

“Ol sumatin husat i bin kisim trening long kamap Treni Pasto long sikispela yia bai ol kisim Diploma bilong  ol na ol Pasto i bin stap pinis long fil na kam bel long kisim moa save long seminari em ol skul 4-pela yia long kisim pepa bilong ol,” Reveran Koi i tok.

Em i tok planti salens i save kamap long laip bilong ol Pasto tasol olgeta i save wok bung wantaim long daunim dispela ol hevi bilong graun na surukim wok na sanap strong long bilip bilong ol long Jisas Krais inap skul i pinis na nau ol redi long greduet.

Dispela namba 48 greduesen de bilong ol em bai kamap spesel wantaim olgeta famili memba na Praim Minista James Marape bikos dispela em bikpela de bilong ol wokman bilong God, na tu Martin Luteran Seminari Trening skul tu i kisim blesing wantaim.

Paulus Tali i raitim