Moa long 2,000 manmeri na pikinini bilong Voice of Zion ministri i kamap long wanpela wik prea konprens long ATS setelmen long Pot Mosbi.

Ol memba bilong ministri i kam long olgeta hap bilong kantri, tasol planti i kam long Westen Hailans provins.

Ministri i bin stat long Westen Hailans long 2007 na dispela yia em i 14 krismas bilong ol autris.

Faunda bilong ministri em tupela meri. Wanpela em propet Julie Anna na narapela em Ivangelis Tress Numdi.

Tupela meri i bin statim dispela ministri taim tupela i yangpela yet na tupela wantaim i no marit i kam inap long tupela i gat moa long 40 krismas nau.

Propet Anna i tok Voice of Zion i bin stat long wanpela de, em na Numdi i go antap long maunten Pagamku long Westen Hailans provins.

“Voice of Zion ministri i bin kamap long singaut bilong Papa God long mitupela. Mi na Ivangelis Numdi i bin pre na fas antap long maunten inap tupela mun na taim mitupela i stap long dispela hap, Papa God i soim mitupela long holim konprens long dispela lukluk.”

Na mipela i stap antap long Pangamku maunten inap tripela yia na bihain mitupela kam daun long veli,” em i tok.

Propet Anna i tok 9-pela yia ol i pilim bikpela pen na laip i hat tasol God i helpim ol.

Siaman bilong prea konprens senta Nemaha Sent i tok ol bai karim aut dispela ministri i go long olgeta hap long kantri.

Joseph Dawai i raitim