NUPELA K1.5 milien Yunaitet Sios Lakani Toi Memorial Sios (LTMC) long Hanuabada long Nesenel Kapital Distrik i op long las wik.

Dispela haus lotu em Bisop Veburi Dabada i opim wantaim helpim bilong Nesenel Kapital Distrik Gavana Powes Parkop na Motu Koita Asembli Siaman na NCD Deputi Gavana Dadi Toka Junia.

Haus lotu inap long holim 1000 manmeri.

Minista bilong Sivil Eviesen na Memba bilong Gazelle Jelta Wong, Modereta bilong Yunaitet Sios Bernard Siai na Jenerel Seketeri bilong PNG Kaunsil bilong Sios Reveren Roger Joseph i bin stap tu namel long 5000 manmeri husat i bin kamap na lukim dispela opening.

Siaman bilong LTMC Udu Vai i tok kamap bilong nupela sios i hanmak bilong bilip bilong manmeri.

Em i tok em i kisim sampela yia long ol manmeri i bungim mani long kamapim dispela sios.

Vai i tok nupela bilding em i bin kamap long hatwok, komitmen na dedikesen bilong ol faunding kongregesen memba taim Yunaitet Sios bilong Papua Niugini i tok orait long Laurabada long kamap olsem wanpela kongrigesen bilong Poreporena Seket insait long Pot Mosbi distrik long 1994.

Ol memba i stat long bungim mani inap long 2020 we ol i stat long wokim haus lotu.

Mista Vai i tok ol i kamapim nupela kongrisen bikos namba bilong ol bilip manmeri i wok long kamap bikpela.

“Ol fanding i kamap long enuel sios kontribusen em ol ekelesia o kongregesen memba yet i save givim long sios na tu ol arapela helpim ol ekelesia i save givim long sapotim sios.

“Dispela ol gutpela wok i kamap ples klia long dispela bilding projek we i kamap bikos long wok bung, komitmen, dedikesen bilong ol memba.

“Mipela i wanpela kongrigesen na mipela i bung long mekim bikpela na stretim dispela haus lotu.

“Wantaim strong bilong God mipela inap long kamapim dispela haus lotu,’’ Vai i tok.

Sios i save holim tupela sevis, wanpela long moning long 7:30 na narapela long 10 klok.

Willie Brul i raitim