Good Shepherd Luteran Sios (GSLC) kongrigesen long Nesenel Kapital Distrik i tokaut long givim K60, 000.00 i go long Ivangelikal Luteran Sios bilong Papua Niugini (ELC-PNG) long helpim wok redi bilong 2022 sinot bai kamap long Pot Mosbi.

GSLC kongrigesen siaman Kingston Alu i mekim dispela toksave bihain long ol i bin holim wanpela tenksgiving de long sios bilong ol long Koki na sampela ol narapela kongrigesen memba bilong Luteran sios i bin kam helpim long bungim mani bilong dispela wok.

Mista Alu i tok bikos Papua distrik bai hostim ELC-PNG 2022 sinot we sikispela kostal provins bilong Papua distrik bai helpim dispela bung bai kamap long Kirap Bek (Resureksen) kongrigesen long Gerehu olsem na mipela olgeta bai kontribiut long helpim ol long redim ples bilong bung.

ELC-PNG sinot i save kamap long olgeta foapela krismas. Las sinot i bin kamap long Simbu long 2017 na long 2022 bai kibung i kamap long Papua distrik.

Long dispela sinot bai ol 17-pela distrik bilong ELC-PNG i save presentim ripot bilong ol wok bilong distrik na tu Nesenel Het Kwata long Ampo i save putim aut jeneral edministresen ripot bilong sios.

Narapela bikpela wok i save kamap long sinot em long ileksen bilong Het Bisop na ol ekseketiv bilong em olsem na planti ol Luteran sios ovasis patna i save kam long harim na lukim wanem samting sios long PNG i save wokim.

Mista Alu i tok moa olsem dispela mani ol i bungim long GSLC em ol i givim wantaim bel na tingting long karim aut gutnius bilong Jisas Kraist.

“Mipela bai helpim ol host kongrigesen yet i go inap long ELC-PNG 2022 sinot i pinis bikos God oltaim i save blesim yumi,” em i tok.

Insait long dispela tenksgiving de ELC-PNG Het Bisop Rait Reveren Dokta Jack Urame wantaim meri bilong em Waura na Gavana Jeneral bilong Papua Niugini Gran Sif Sir Bob Dadae na meri bilong em Lady Emerlina na sampela ol bikman na meri bilong sios na gavmen tu i bin stap long dispela bung.