Yu skulim mipela gut bai mipela i ken save olsem mipela i no inap i stap longpela taim long graun. Olsem na bai mipela i gat gutpela save tru. Buk song 90:12

Planti taim wanpela Kristen dokta i save go lukim wanpela lapun man, nem bilong en Jon. Taim dispela dokta i go lukim ol sikmanmeri, em i no save toktok long sik bilong ol tasol. Nogat em i save autim tok bilong God tu long ol. Jon na meri bilong em i save harim tok bilong God, tasol tupela i no redi long givim bel long Jisas.

Nau dispela lapun man i kisim kus na em i pilim no gut. Dokta i kam lukim em na i tok long em bai i salim marasin i kam long em.

Taim dokta i laik lusim haus, meri bilong em i askim, “Man bilong mi bai i kisim marasin olsem wanem? Em bai i mas kisim hamas marasin, na wanem taim stret em bai kisim?” “Mi bai raitim long botol,” dokta i bekim tok. Na bihain dokta i tanim na lukluk long sikman na i tok, “i no luk olsem sik bilong yu i bikpela tumas. Bai mi salim marasin i kam, tasol ating bai yu wet inap wanpela mun bihain yu ken stat long kisim dispela marasin”.

Tupela lapun i kirap nogut na tupela wantaim i tok, “Olsem wanem wanpela mun bihain, a?” “Yu no laik wet wanpela mun?” dokta i askim Jon. “No gut bai mi no stap laip moa wanpela mun bihain,” Jon i bekim tok. “Yes, mi no save” Dokta i tok, “Tasol yu mas tingim, sik bilong yu ino bikpela tumas. Tasol sapos yu no laik wet wanpela mun, orait ating yu ken wet wanpela wik, na bihain yu ken kisim marasin”.

Jon i pilim narakain na i tok, “Dokta, nogut bai mi no moa stap laip wanpela wik bihain.” Dokta i bekim tok. “Mi no inap save bai yu stap laip yet wanpela wik bihain, tasol sik bilong yu ino bikpela tumas na marasin i stap long haus bilong yu. Wanem taim sik i laik go bikpela, bai yu ken kisim marasin.” Jon i no bel isi yet. “Dokta, mi inap dai nau nait na bai em i leit tumas long kisim marasin. Yu no ken kros, nau tasol mi laik stat long kisim marasin. Marasin i no inap helpim mi liklik sapos em i stap long botol tasol”

Nau dokta i tok, “Yes, tru. Tude yu mas kisim marasin. Yu no ken wet. Tasol mi laik kirapim tingting bilong yutupela long marasin God i laik givim long yutupela bilong oraitim bel bilong yutupela. Longtaim pinis Jisas i singautim yupela. Tasol oltaim yupela i save tok, ating neks wik o neks mun o neks yia bai mipela ken opim bel long em. Tasol nogat. Nau em i gutpela taim. Husat bai tokim yupela, bai yupela i stap laip tumoro?. Yupela i mas tingim tok bilong God long 2 Korin 6:2, God i tok olsem, “Harim, nau tasol em i taim bilong God i mekim gut long yumi. Nau tasol em i taim bilong God i kisim bek yumi”

Aiwara i pundaun long ai bilong dispela lapun man taim dokta i sekanim em na lusim haus na i go. Dokta i go pinis, na lapun man i tokim meri bilong em olsem, “Dokta i bin mekim strongpela tok. Tasol tok bilong em i tru. Mitupela i no ken wet wet na westim taim, nogut bai mitupela i nogat rot moa bilong tanim bel”.