PAPA bilong mipela em i prea Jisas yet i bin skulim ol aposel bilong em.

Em i wanpela sotpela prea tasol i gat naispela toktok wantaim mininig i stap long em.

Sapos yu lukluk gut long straksa bilong em, bai yu painimaut i gat ol toktok bilong preisim God, bilong tenkim em na bihain i gat askim bilong kisim helpim long em.

Tasol mi laik askim yumi wan wan olsem, em i tru God em i papa bilong mipela? O God em i papa bilong Yu o papa bilong ol?

I gat wanpela stori i bin kamap olsem: Wanpela de, i gat wanpela rabisman i kam na askim kaikai long wanpela strongpela Kristen man. Dispela Kristen man em i gat planti samting, em i wanpela mani man.

Taim rabisman i kam long fran bilong haus na askim long kaikai, dispela Kristen man i krosim em bikos em i save kam long askim tumas. Bihain long krosim em, em i tokim rabisman i go long baksait we i gat hauskuk i stap long em.

Em i tokim kukmeri bilong em i redim sampela hap kaikai bilong asde nait na putim long wanpela plet i no gutpela tumas.

Plet i ros na i gat hul. Kap bilong dringim wara i no gutpela na i luk nogut.

Bihain kukmeri i redim kaikai pinis, dispela Kristen man i go kisim na tokim rabisman long sindaun long graun klostu long dua bilong hauskuk.

Taim rabisman i kisim kaikai na em i laik stat long kaikai, dispela Kristen man i tokim rabisman olsem, “No ken kaikai pastaim. Yumi wokim prea askim God long blesim kaikai bilong yu.

Rabisman i putim bek kaikai i go daun long plet na joinim man long prea.

Bihain long ol i mekim mak bilong kruse; Kristen man i statim prea bilong Papa bilong Mipela.

Taim em i stat long prea, “Papa bilong mipela, yu stap long heven………,” em i harim rabisman i no wokim prea olsem em i wokim.

Em i harim rabisman i prea olsem: “Papa BILONG YU i stap long Heven…,”olsem na Kristen man i stop na tokim rabisman long bihainim ol toktok em i mekim long prea.

Na rabisman i prea gen; “Papa bilong Yu i stap long heven…..,” Kristen man i tokim em…dispela i rong. Yu mas kolim ol nem olsem mi kolim. Yu prea olsem: PAPA BILONG MIPELA YU STAP LONG HEVEN……..”

Rabisman i tokim Kristen man olsem: “Em i no papa bilong mipela, …em i papa bilong yu!” Mani man i tok nogat, em i papa bilong mipela. Yu mas prea olsem mi prea long em, Papa bilong Mipela yu stap long heven.

Tasol rabisman i no bihainim. Olsem na mani man i askim em, “Bilong wanem yu tok Papa bilong Yu?

Rabisman i bekim na tok: “Yes, em i papa bilong yu. Sapos papa bilong mipela, em i mak olsem yumi tupela i brata. Sapos yumi tupela i brata, yu bai i no inap givim hap kaikai long mi, yu bai givim nupela kaikai olsem yu kaikai long em.

“Sapos em i papa bilong mipela na yu brata bilong mi, yu bai givim gutpela plet na kap, na tokim mi long sindaun long sia na kaikai wantaim yu long tebol bilong kaikai. Olsem na God em i papa bilong yu, i NO PAPA BILONG MIPELA”.

________

• Gutpela skul bilong yumi olgeta Kristen manmeri long skelim na glasim wanem kain pasin yumi mekim long bratasusa bilong yumi husat i no stap gut long laip.

• God em i papa bilong mipela olgeta. Yumi olgeta i pikinini bilong em. Yumi olgeta i brata na susa! Em tru?

• Sapos tru, nau yumi mas soim long laip bilong yumi. Sapos tru, dispela spirit i stap laip, ating yumi bai i no gat hevi, kros pait na bagarapim laip bilong wanpela na narapela.

For Wantok Niuspepa, 5 Novemba 2020