MADANG Katolik Asdaiosis i bin holim tripela bikpela lotu long Holi Spirit Katedral, Madang long las wik.

Dispela ol lotu em tok promis bilong Asbisop Anton Bal; blesing bilong Asdaiosis Pastoral Plen na blesing bilong ol Katolik Profesinal Sosaiti memba.

Tok promis bilong Asbisop Bal em ol i kolim “Imposition of Pallium” o promis bilong Asbisop Bal i mas pas wantaim na bihainim ol tok i kam long “Holy See” o opis bilong Pop.

Asbisop Bal olsem het bilong wanpela eria o rijon bilong Katolik Sios i mas karimaut ol tok opis bilong Pop i mekim.

Asbisop Bal i mekim tok promis bipo long ai bilong Apostolik Nunsio, mausman bilong Pop, Asbisop Kurian Mathew Vayalunkal.

Asbisop Emeritus William Kurtz, Bisop Rozario Menezes bilong Lae, ol pater, bruda, sista, katekis, sios lida na bilipmanmeri i kamap tu long lukim Asbisop Bal i mekim tok promis. Ol i lukim tupela ol arapela lotu i kamap.

Sampela ol kalabus lain long Beon Haus Kalabus i bin kamap tu long lukim dispela ol lotu na ol i bin go pas tu long sampela hap bilong lotu.

Dispela sia bilong Pop em i bihainim tredisen o tumbuna lain stat long Aposel Pita i kamdaun inap long nau Pop Francis i stap long em.

Olgeta Katolik bisop, pater, bruda, sista, katekis, sios lida, bilipmanmeri long wol i mas bihainim ol tok i kam long opis bilong Pop.

Lotu bilong blesim Madang Asdaiosis 5-Yia Pastoral Plen em Asbisop Bal i askim olgeta dineri na peris long kamap wantaim plen na givim dispela plen long opis bilong em.

Ol dineri na wan wan ol peris i mas kamapim ol wok bihainim dispela plen.

Asdaiosis Pastoral Kaunsil wantaim ol peris pater, ol katekis na sampela prea grup lida i bin bung long Alexishafen na kamap wantaim dispela plen.

Dispela plen nau i stap long han bilong tupela din na Katolik Profesinal Sosaiti.

Lotu bilong Katolik Profesinal Sosaiti i lukim 32 memba i laitim kendel na soim olsem ol bai kamap lait o maus bilong ol lain husat i no gat sans bilong autim bel hevi bilong ol.

Presiden bilong sosaiti Paul Harricknen na Spiritual Dairekta Pater Ambrose Pereira i tokim ol olsem ol i mas stap witnes bilong Jisas Krais long ol arapela lain.

Askim i go long ol long pas wantaim Jisas long olgeta de long pre na lotu.

Blesed Peter ToRot i Petren Santu bilong sosaiti na ol i ken bihainim bilip bilong Blesed Peter long wok bilong ol na askim em long kisim helpim tu.

Pater Ambrose Pereira i raitim