Luteran Wol Fedaresen i salim tok lukaut long Ivangelikal Luteran Sios bilong Papua Niugini (ELC-PNG) long was gut long ol hevi i wok long kamap long wol nau.

Dispela toksave em ELC-PNG Papua Distrik Presiden Reveren Gundu Kargl i mekim long taim em i opim namba 31 Papua distrik wokmeri konferens long Marimari Luteran sios long Pot Mosbi.

Rev. Gundu i tok wol nau i no seif long ol Kristen olsem na yumi mas pre long Papa God i strongim i

Em i tok kainkain bikhet pasin bai pinis long dispela graun tasol bilong God bai i no inap pinis olsem na yumi olgeta i mas pre olgeta de long abrusim dispela hevi.

“PNG em i Kristen nesen na mama lo bilong kantri i tokaut klia long prektisim Kristen prinsipel insait long PNG,” em i tok.

Papua Distrik Presiden Gundu Kargl i tok sios i gat longpela na ris histori na hap bilong populesen husat i save strong long lotu na pre olgeta de long famili na sios em ol meri olsem na mi tok tenkyu tru long yupela ol mama.

Rev. Gundu i tok tenkyu long ol man bilong ol meri long lusim ol meri na pikinini meri i kam long dispela konferens.

Em i tok ol meri i bin wok wantaim Jisas taim em bin kam stap hia long graun na ol i wok strong yet long autim gutnius bilong Jisas Kraist long taim nogut na gutpela taim.

ELC-PNG i gat 17-pela distrik , 15-pela i stap long Niugini meinlen wantaim Sauten Hailans na Hela provins, wanpela i stap long Niugini Ailan na Papua Distrik i stap insait long sikispela kostal provins bilong Papua olsem; Oro, Milen Be, Sentral, NCD, Galp na Westen.

Faivpela provins i bin kamap long dispela bung tasol Westen i no bin kamap bikos long COVID-19 sik na hevi bilong komiyunikesen.

ELC-PNG Nesenel dairekta bilong ol meri Cathy Mui i bin kamap long dispela konferens na em i tok dispela i kamap bikos ol meri i soim bilip long eksen bilong ol.

Em i tok Nesenel Het Kwata long Ampo, Lae i no save sapotim ol long dispela kain konferens tasol ol i save baim tiket bilong balus, kar fea wantaim helpim bilong ol sponsa.

Moa long 500 mama na yangpela meri i bin kamap long dispela tripela de konferens i bin stat long Trinde na pinis long Fraide las wik.

Joseph Dawai i raitim