RESURECTION Luteran Sios long Lae siti i bin lukim ol Sande Skul pikinini i go pas na mekim fand raising bilong ol long las wik Sande.

Dispela fand raising ektiviti bilong ol Sande skul pikinini i bin kamap gut stret we ol singsing, danis na tu ol i painim klos na salim K15 rafle tiket long winim prais.

Long wankain taim kodineta bilong ol husat i go pas long dispela program Phillip Pep i tok Sande skul i mekim mani long wokim nupela haus lotu bilong ol long Lae, olsem na ol i askim olgeta papamama na bilip manmeri long kam sapotim na baim ol kaikai na tiket.

Mista Pep i tok tenkyu na amamas long ol Sande Skul pikinini husat i go pas long dispela wok bilong sios na sapotim projek bilong nupela haus lotu.

Em i tok pasin bilong wok bung wantaim i save bringim bikpela blesing long laip bilong wan wan bilip manmeri na pikinini bikos yumi bungim han na wok wantaim long pinisim wok misin bilong yumi yet.

Siaman bilong peris, Ben Woo husat i save sapotim sios wok olgeta taim, i bin stap long lukim program bilong ol Sande Skul pikinini na amamas wantaim ol.

Em i bin amamas long bikpela wok bilong ol Sande skul pikinini na salensim ol papamama long no ken lusting long sapotim ol pikinini bikos laip bilong ol em bikpela samting na God Papa bai blesim laip bilong wan wan bihain taim. Em i tokim ol long lukautim ol pikinini gut wantaim amamas na stretpela rot.

Siaman Woo i tok as tingting bilong Tenks Givim em bilong painim rot long sapotim projek bilong nupela haus lotu, sios yet i kisim sapot kam long ol bilip manmeri em K100,000 tasol dispela nupela haus lotu bai nidim K1 milien long pinisim.

Paulus Tali i raitim