PASIN bilong ol pikinini meri i karim nating ol pikinini we i no gat gutpela marit pasin inap kamapim hevi long mama, famili na komyuniti, Marielle Sanders, Kantri mausmeri bilong Yuaintet Nesenel Famili Plening Asosiesen (UNFPA) i tok.

Em i tok planti taim ol pikinini i kamap long dispela kain rot i no save kisim gutpela lukaut long mama yet na famili.

Sanders i mekim dispela tok long taim bilong long lonsim “Family Planing Situation Analysis” Ripot long Goroka, Isten Hailans long las wik.

Em i tok bikos i no gat gutpela lukaut long pikinini, em i ken tanim na mekim ol pasin we i no gutpela long komyuniti.

Em i tok wanpela hevi we pikinini i ken bungim em long em ol sik olsem Seksueli Trensmitet Infeksen na ol meri i ken karim pikinini long taim ol i no marit yet.

“Mipela i mas tingting na putim pasin na hevi bilong famili plening i go pas, lukluk na traim long stretim gutpela sindaun bilong yumi,” Saunders i tok.

“Laip i no samting nating na i no samting bilong pilai.

“Gavman i mas lukim dispela hevi olsem wanpela namba wan hevi na em i mas stretim.”

Isten Haians Provinsal HeltAtoriti (EHPHA) Sif EkseketivOpisa Dokta Joseph Apa i tok famili plening i bikpela samting we helt bilong ol yangpela meri na man na ol mama na papa i mas kamap wantaim gutpela plen.

Em i tok dispela bai kamapim gutpela sindaun long komyuniti.

“Mipela i luksave long ol hevi bilong famili plening, na mipela i save wok hat tu long stretim dispela ol hevi,” Dokta Apa i tok.

“Mipela i laik helpim ol yangpela man na meri na ol papa na mama long banisim ol yet long ol samting we i no gutpela.

“Ol hevi inap bagarapim sindaun bilong yumi.”

Dokata Apa i tok EHPHA bai i go het yet long wok poroman wantaim UNFPA long stretim gut ol fesiliti o ol famili plening klinik long ol distrik long provins.

Sape Metta i raitim