NESENEL Sios Edukesen Kaunsil (NCEC) bai lonsim Mama Lo na Menesmen Polisi bilong em long 6 Novemba, Michael Ova, Siaman bilong NCEC i tok.

Em i tok olgeta pepa wok i pinis na i wetim tasol ol las wok long kamap bipo long ol i ken lonsim.

Em i mekim dispela tok bihain long wanwik woksop long las wik we i bin kamap long Sogeri Lods long Sogeri Rot ausait long Pot Mosbi.

Inap long 13 patisipen bilong ol Nesenel Sios Edukesen Seketeri bilong 7-pela bikpela sios olsem Luteran, Anglikan, Yunaitet, SDA, Salvesen Ami, Baptis na Katolik i bin kamap long dispela woksop.

Mista Ova i tok tenkyu long wok poroman bilong Australia na PNG gavman long sapot bilong ol.

“Endosmen na lonsing i bikpela samting long mekim Nesenel Sios Edukesen Kaunsil i sanap bilong em yet na long painim rot long lukim Seketeriet i wok aninit stret long PNG Kaunsil ov Sios,” em i tok.

“Kamap bilong NCEC na ol wok divelopmen wantaim Mama Lo na Menesmen Polisi nau mipela i kamapim bai i no inap kamap sapos sapot bilong dispela wok bung namel long Australia na PNG gavman i no stap.”

Ova i tok tenkyu tu long Dominic Maelin, legal opisa bilong Dipatmen bilong Edukesen.

Em i tok planti ol toktok i pas long wok bilong lo em Maelin i bin helpim long stretim long kamapim dispela Mama Lo na ol Polisi.

Em i tok tenkyu tu long Edukesen Minista Joseph Yopyyopy na Edukesen Seketeri Dokta Uke Kombra long wok bung na gutpela sapot ol i givim long NCEC.

Nigel Akuani i raitim