TUPELA de woksop bilong wanpela nupela onlain autris Ministri, Translators “Network International”(TNI) i bin kamap long Waigani, Pot Mosbi long tanim tok Inglis baibel i go long tokples bilong ol yet  long intanet.

TNI seremoni masta, Pasto Bisa Waisama, i tok dispela ministri i save kamapim ol trening program bilong em long intanet long trenim ol pasta, lida na evanjelis long olgeta hap long graun na Papua Niugini i memba bilong ol.

Pasto Waisama i tok dispela em i nupela na isi rot long tokaut long planti manmeri long wol long tok bilong God long ol husat i no save yet long Gutnius bilong Jisas Kraist.

Rekot bilong TNI i soim 3 bilien kopi bilong ol buk baibel trenselesen na stadi gaid em ol autris ministri long olgeta senta i givim aut pinis long 242 kantri.

Pasto Waisama i tok tu olsem moa long 2000 tokples TNI i tanim tok na namba i wok long go antap. Dispela i mekim planti ol pipel long wol i isi long save long Kristen relijon long tokples bilong ol yet.

Papua Niugini i stap senta 4 wantaim ol kantri olsem, Vanuatu, Federetet Stet ov Micronesia, Palau, Northern  Mariana, Nauru, Cocos Ailan na Nortfolk ailan.

PNG i gat 8-pela tokples sevis long wan wan wik, wanpela yut onlain tokples sios, na wanpela pikinini onlain sios long tokples.

Autris ministri i save redi oltaim long tanim na salim toktok long intanet long go long planti ol pipel long tokples bilong ol.

Pasto Waisama i tok em i tru olsem Jisas bai kam bek gen olsem na yumi olgeta i mas redi.

Joseph Dawai i raitim