Sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi. Na em bai i rausim olgeta pasin no gut i stap long yumi na mekim yumi kamap klin. 1 Jon 1:9

Long olgeta ples insait long ples matmat ol i save planim wanpela ston long wanwan man o meri i dai long en. Long dispela ston ol i save raitim nem bilongol man o meri i dai. Sampela taim ol tu i save raitim wanpela Baibel ves o arapela tok antap long het ston.

Long wanpela liklik taun long wanpela kantri wanpela ples matmat i stap na long dispela matmat wanpela ston i luk narakain liklik. Long dispela ston i no gat nem, ol i no putim de, na i no gat Baibel ves. Dispela wanpela tok tasol ol i putim, “Lusim rong pinis!” Yes, dispela sotpela tok i gat bikpela as na bikpela mining.

Dispela tok i stap long matmat bilong wanpela meri i bin go insait long kain kain amamas bilong dispela graun, na ol dispela pasin bilong graun i pulim em long mekim planti pasin no gut. Dispela meri i bin mekim planti trabel, na em i stap long taim long kalabus. Long dispela kalabus hap em i bin harim tok bilong God. Dispela tok i bin sutim bel bilong em na em i kam long Jisas na em i sori long olgeta pasin no gut em i bin mekim.

Jisas i lusim rong bilong em pinis na i  senisim laip bilong em olgeta. Taim em i lusim kalabus gen, em i save wokabaut long dispela nupela laip Jisas i bin givim em. Em tu i autim testimoni long ol lain bilong en, olsem wanem Jisas i bin sori na marimari long em na i bin lusim olgeta sin na pasin no gut bilong em. Dispela meri i pasim tok olsem, “
Taim mi dai, yupela i no ken raitim planti tok long ston long matmat bilong mi. Dispela wanpela tok tasol mi laik bai yupela i raitim, ‘Lusim rong pinis!’”

Dia wantok na pren, yu ting olsem wanem long yu? Taim yu dai bai ol man i ting wanem long laip bilong yu? Bai wanem tok i fit long ol i ken putim (raitim) long ston bilong matmat?

Ating biknem o arapela ol gutpela wok yu bin mekim bai i helpim yu a? Nogat. Yu mas save, Jisas i bin tekewe olgeta rong bilong yu na i mekim yu i kamap klin. Olgeta hatwok yu inap mekim em i mekim pinis. Tenkyu stret.