LAE Siti Luteran Sios i bin holim namba 33 Konprens bilong ol long Church of Hope klostu long Yunivesiti bilong Teknoloji long Lae, Morobe Provins.

Dispela bung i bin stat long 21 Oktoba na pinis long 25 Oktoba 2020. Konprens i bin bungim ol Kristen bilip manmeri husat i bin makim vot lain wantaim wokman bilong God olsem ol pasto, evanjelis, yut lida, Sande skul tisa, kodineta na ol het meri bilong sios.

Moa long 350 bilip manmeri, ol yut na pikinini i bin kamap long lukim dispela bung bilong Luteran Sios bikos em bikpela samting insait long kalenda bilong sios. Olgeta yia sios i save bungim ol long makim nupela lida na plenimg visen o gol bilong ol long sios.

Olgeta Luteran bilipman na meri i bin autim tru Gutnius bilong God wantaim bilip bilong ol long dispela bung. God i save makim wan wan hetman long lukautim sios na sipsip bilong ol wantaim. Long wankain taim Luteran sios i tingtim tru Gutnius na serim wantaim olgeta Kristen olsem wanpela famili na olgeta i mas go aut long mekim trupela wok bilong Bikpela.

Paulus Tali i raitim