Long 8 klok moning, pikinini man bilong wanpela mama i gat sik asma i bin kisim bagarap nogut.

Mama i wari tru.

Em i save em i mas bringim pikinini bilong em hariap i go long haus sik inap long wan kilomita samting.

Em i ran i go long ol poro i stap klostu long haus bilong em husat i gat kar long kisim helpim.

Tasol papa bilong kar i tok nogat disel.

Em i ringim pasto bilong em. Tasol pasto i tok em i gat sampela visita i stap long miting na em i no inap lusim ol.

Em i no inap painim helpim moa. Em i mas karim pikinini i go long haus sik nau yet.

Em i no laik lusim pikinini bilong em. Olsem na em i kisim pikinini boi bilong em na ran i go long haus sik.

Lek bilong em i no stret, em i kalap kalap liklik na pikinini i hevi tru olsem na em i no inap ran hariap.

Em i no laik bai dispela pikinini bilong em i dai olsem man bilong em tu i dai pastaim long dispela sik.

Long rot em i bungim planti manmeri. Em i singaut long kisim helpim tasol nogat wanpela man o meri i redi long helpim em.

Ol i lukluk tasol long em i karim pikinini na i ran i go. Em i ran i go yet.

I no longpela taim em i bungim wanpela longlong man. Em i bun nating tru. Werim doti klos na klos i bruk bruk nabaut.

Olgeta man i save em i wanpela longlong man i save raun nating long dispela rot.

Dispela longlong man i lukim meri i karim pikinini na em i ran i go long em.

Maski em i longlong tasol em i luksave olsem mama i nidim helpim tru long dispela taim, olsem mak bilong wanpela bikpela hevi bai kamap.

Taim longlong man i kamap klostu long mama, em i kisim pikinini boi long han bilong mama, na mama wantaim sot win i tok “haus sik”.

Dispela tok i klia tru long longlong man pinis, na em i tok; “No ken wari mama. Olgeta samting bai orait.”

Longlong man i putim boi antap long solda bilong em na i givim 60 i go long haus sik, lusim mama i ran isi i go bihain.

Taim longlong man i go kamap long haus sik, dokta na nes i lukim em i wanpela longlong man tasol i karim pikinini.

Ol dokta na nes i ran go bungim em, bikos ol i save olsem samting i asua.

Ol dokta na nes i hariap kisim bet i gat wil long em, rausim boi long solda bilong longlong man na slipim boi antap long bet na ran i go long emejensi rum.

Ten mini bihain, mama bilong boi i kamap wantaim win sot.

Dokta i bungim mama na i tokim em: “Tenky long God na longlong man long helpim yu.

“Sapos longlong man i no helpim yu na yu yet i karim pikinini i kam long haus sik na sapos longlong man i leit 5 minit, dispela boi inap dai.

“Tasol longlong man i helpim yu olsem na mipela inap long sevim laip bilong pikinini bilong yu.”

Longlong man i sanap klostu na harim, na em i smail tasol long mama na long dokta!

Mama i holimpas longlong man na tok tenkyu long em.

_______________________________________

• God i no save yusim ol wokman bilong em olsem pasto, famili/neiba, politisen o rits man tasol man nating long helpim yumi. God i save yusim manmeri no gut tu long helpim na sevim yumi.
• No ken wari long wanem samting bai kamap long laip bilong yu o wanem kain hevi o wari yu karim nau - yu stap long han bilong God. Em i gat plen pinis long yu. Em i gat wanpela ensel i sanap o wokabaut long rot na redi long helpim yu. Trastim em!