YUT Ministri bilong Yunaitet Sios i pre long ol sios i stap strong na wok gut.

Long taim ministri i go pas long ogenaisim ol bung bilong ol yangpela, em i pre tu long ol lida bilong sios.

Las wik Ministri i givim taim long pre long Pasto Micah Apani wantaim meri bilong em, Marama Dorcas na pikinini bilong em Shalom Apani husat i stap na wok long Forok Yunaitet Sios long Is Sepik Provins.

Ministri i pre bai God i blesim em na wok bilong em long dispela rijon.

Arere long Forok, Pasto Apani i lukautim tu Kanduanum na Kamangawi sios.

Dispela yia i namba 5 yia bilong pasto long stap long Forok.

Long 2018 Reverend Apani i tok orait long ol Ministri i holim Nesenel Yut Konvensen bilong sios long provins.

Pasto Apani i bilong Sentral Provins.

Long wankain taim, bihainim toksave bilong Sios em Yunaitet Sios Modereta, Reveren Bernard Siai i givim, Ministri i no inap holim ol bung bilong em long dispela yia inap long taim gavman i tok orait.

Ministri i tok em bikos long kamap bilong sik coronavirus (COVID-19).

Ministri i askim ol yangpela long pre na stap strong long bilip bilong ol long dispela taim bilong COVID-19.