KIRAP Bek kongriesen o Resureksen kongrigesen bilong Ivanjelikal Luteran Sios (ELC) PNG long Lae distrik, Morobe Provins i holim enuel distrik konprens bilong em long las wik.

Konprens i kamap bilong ol sios lida i givim ripot long wok i kamap na long konprens i kamap wantaim ol nupela rot bilong strongim wok bilip long distrik.

Reveren Qogi Zongoreng bilong Good Shephard Sios long Koki, Nesenel Kapital Distrik na presiden bilong Papua Distrik i opim dispela konprens.

Konprens i kamap long bung haus bilong Niu Rok sios na ol lain delegesen i kam long ol peris olsem Busu, Lae Siti Seket na Yabim.

Reveren Zongoren, long lotu bilong em long statim konprens i tok ol lida bilong sios na bilip manmeri i mas bihainim skul na pasin bilong Jisas long lukim gutpela sindaun.

“Sapos yu laik stap gut yu mas kisim Jisas tru long laip,” em i tok.

“Tok bilong God em Jisas husat i Krais na Sevia bilong yumi.

“Yumi no ken gat tupela bel taim yumi bihainim Jisas. Dispela bai bagarapim yumi.”

Reveren Zongoren i bihainim Baibel rit long 1 Korin 3: 16 na i tok yumi haus holi bilong God na olsem yumi i mas lukautim laip bilong yumi.

Em i tok bilip bilong yumi long Jisas yet bai sevim yumi.

Em i strongim tingting bilong ol manmeri long skul Martin Luter i bin mekim.

Em i tok long bilip bilong yumi long Jisas na long marimari bilong God yet  bai kisim yumi i go long Kingdom bilong God.

Em i strongim bilip bilong ol manmeri tu long skul bilong kisim Sakramen bilong baptais na kamap pikinini bilong God.

Em i tok long laik na marimari bilong Papa, em i salim Jisas i kam daun na dai long yumi.

“Jisas i dai na mekim rot bilong yumi pinis long go long Papa,” Reveren Zongoreng i tok.

“Yumi nau i mas bilip na soim ol arapela manmeri long Jisas Krais na skul bilong em.

“Yumi mas bungim ol salens long laip olsem Bikpela Jisas i karim diwai kros i go long Maunten Kalveri.”

Paulus Tali i raitim