KATOLIK Sios long Rabaul Asdaiosis, Is Nu Briten Provins i redi long putim Bisop Rochus Tatamai long asbisop sia bilong em.

Dispela wok bai kamap wantaim bikpela lotu long Vunapope Katedral, Kokopo long dispela Sande.

Nau yet Bisop Tatamai i bisop bilong Kavieng-Lorengau Daiosis.
Pop Francis i makim Bisop Rochus Tatamai long kamap bisop bilong Rabaul Asdaiosis long Jun dispela yia.

Dispela em bihain long Pop Francis i tok orait long askim bilong Asbisop Francisco Panfilo long ritaia na pinis wok olsem misineri.

Ol bisop i save ritaia long wok taim ol i winim 75 krismas.

Long 2018 Pop i bin makim Bisop Tatamai long wok olsem bisop bilong Kavieng-Lorengau Daiosis bihain long em i wok long Bereina, Sentral Provins long 10-pela yia.

Pastaim long Tatamai i wok long Bereina, em i bin stap oksileri bisop bilong Kerema Daiosis, Galp Provins.

Bisop Tatamai i bihainim makim bilong em long kamap asbisop Rabaul Asdaiosis i bin tokim Wantok Niuspepa pastaim olsem kisim kain singaut olsem i hap wok bilong God.

Em i tok wanem hap sios i makim wokmanmeri bilong en long go wok, dispela em i singaut long laip bilong ol na i nogat asua long dispela.

Em i tok i gat ol salens em bai bungim bikos em i go long asples daiosis bilong em em yet i bilong Rakunai peris na wanpela tumbuan bilong Blesed Peter ToRot long Gazelle, Is Nu Briten Provins.

Long gutpela sait em long ol pipel; ol leiti, pater, bruda na sista i save long em. Em i save long ol.

“Gutpela em olsem mi save long ol dineri long Rabaul, Kokopo na Pomio na ol salens ol i gat long ol pastoral wok, long helt na edukesen sevis na ol arapela wok,” Bisop Rochus i tok.

“Tasol bikpela salens em long rot bai mipela i bungim dispela save mipela i gat na kamapim ol wok we i ken helpim ol pipel.”

Bisop Tatamai i tok sapos em i go long asples bilong em yet o long narapela hap, em i no samting bilong wanpela i painim amamas. No gat.

“Dispela em long kam save long laik bilong God long ol pipel bilong em wantaim lidasip ol i nidim long strongim bilip bilong ol na rot bilong kisim salvesen.

“Mi bai go het yet long ol pastoral program bilong mi na wok wantaim plen ol i gat pinis, maski wanem hap ol i kam long em.

“Mi mas gat dispela lidasip we i sevim olgeta manmeri na dispela i bihainim laik bilong God.”