Lo em i bilong protektim na lukautim olgeta man, meri na ol pikinini wantaim, Pasto Kasi Tau i  tok.

Papua Niugini Kristen Lida Alaens Pasto Kasi Tau i mekim dispela toktok long wanpela bung bilong ol meri long Rigo bihainim wanpela askim bilong wanpela mama long jenda beis vailens.

Pasto Kasi i tok tru olsem i gat lo i banisim ol meri na pikinini tasol ol mama, pikinini meri na ol liklik pikinini tu i mas pleim pat bilong ol long abrusim ol dispela kain hevi bilong jenda beis vailens.

Em i tok planti meri na yanpela pikinini meri i save raun long ples i no seif tumas olsem nait klap o go aut wantaim ol pren long sampela hap i no seif tumas long ol na bungim birua.

“Hevi bai i no inap kam nating long ol meri na pikinini, wok bilong lukautim toktok na pasin bilong yupela yet i mas gut pastaim,” em i tok.

Em i tok ol meri na pikinini o papamama i mas lainim long bihainim tok i stap long Baibel bikos dispela tok inap givim yu gutpela tingting long rispektim man, meri na ol pikinini tu.

Pasto Kasi i tok pasin bilong bihainim kalsa bilong ol waitman tu i  bagarapim planti manmeri na pikinini.

“God i wokim yumi man na meri i kamap naispela tru long ai bilong em na pasin bilong rispekt na bihainim lo i mas stap tu,” em i tok.

Pasto Kasi i tokim ol meri long tingim sefti pastaim na no ken mekim pasin bai inap bringim trabel i kam insait long famili na komyuniti bilong ol.

Joseph Dawai i raitim