RIJEKSEN

MI bin mekim dispela stori long 385 sumatin bilong Goroka Sekenderi Skul na tisa bilong ol long 31 Ogas 2020, taim mi lidim Moning preis long skul bilong ol.

Mi ritim Gutnius bilong Luk 4:16-30 –Ol Nazareth i tok NOGAT/rijektim Jisas long as ples bilong em!

Stori bilong wanpela yangpela boi, John na yangpela girl Lita. John i kam long wanpela turangu famili i stap long setelmen.

Lita i kam long wanpela family we i gat planti samting, i gat olgeta samting i stap.

Tupela i bin kamap gutpela poroman stret stat long HaissKul, Sekenderi skul na go long yuniversiti.

Tupela i kamap gutpela poroman stret. Bihain long graduesen John i stat long wok. Wanpela deemisingautimLita long kaikailanswantaim. Bihain long kaikai John i tokim Lita olsem em i laik maritim em.

Lita i kirap nogut na i tok NOGAT.

Em i tokim John olsem, “Yumi tupelo em i kamap gutpela pren long taim i go pinis.

Tasol long maritim yu, mi bai i no inap. Bikos yu kamap long turangu famili na fotnait bilong yu i no inap long helpim mi long wokim soping bilong mi long wanpela de. Olsem na mobeta yu painim narapela meri na maritim em.”

Taim John i harim TOK NOGAT bilong Lita, bel bilong em i bagarap tru. Stat long dispela de, tupela i no lukim narapela narapela moa.

John i wok tasol long bisnis bilong em. Em i no inap painim narapela meri long marit. Laikim bilong em i stap tasol long Lita.

Stap nau 15 yia i go pinis tupela i no save bungim moa. Wanpela de Lita i go soping long wanpela supamaket. Wantu tasol em i bungim John. John i kirap nogut tru taim em i lukim Lita.

Tupela i stori liklik na bihain Lita i askim John olsem: “Yu marit pinis o nogat?” John i tokim em, “Taim yumi tupela i brukim rilesensip bilong yumi, mi no marit inap nau.

 Mi tingting tasol long wok bisnis bilong mi”. Na Lita i tokim em; “Mi marit pinis na man bilong mi em i save kisim K5000 long wanpela fotnait, olsem na mi amamas na wokim soping bilong mi long dispela stua.”

Taim tupela i sanap stori i stap, wantu tasol man bilong Lita i kamap na i kirap nogut long lukim John i stori wantaim Lita.

Bihain long tok gude, em tokaut long Lita long John olsem; “Lita em i meri bilong mi.”

Na bihain em i tokim Lita: “Mista John em bos bilong mi. Mi wok long kampani bilong em.

“Em i gat bikpela kampani, tasol inap nau em i no marit yet, bikos nambawan meri em i bin poromanim long taim bilong Haiskul i go long yuniversiti, i tok nogat o rijektim laik bilong em.

“Olsem na em i no laik maritime narapela meri. Trupela laikim bilong em i go long dispela meri tasol.”

Taim Lita i harim dispela tok, em i sem nogut tru. Bikos John tasol i givim K5000 fotnait long man bilong em.

Nau John em i mani man na i gat planti samting. Em i no turangu olsem bipo. Lita i tokim em yet,

“Dispela man mi bin tok nogat long laikim bilong em, nau i gat bikpela kampani na i gat plnati mani na i winim fotnait bilong man bilong mi.”

Lita i tok sori tru, bilong wanem em i no tok orait long maritime John bipo!?

Fr. Paul Liwun SVD