MASKI kain kain tok, Papua Niugini i wanpela gutpela kantri long stap, wanpela leiman misineri i tok.

Leiman misineri Jaroslav Střasák, husat i bilong kantri Sek (Czech) Ripablik long Yurop na i wanpela dokta i bin wok 7-pela mun long Araimiri, Kaintiba, wanpela rurel distrik long Galp provins tasol i lusim kantri long las wik.

Long taim em i bin kam long kantri long 10 Februeri, em i pilim kantri i narapela kain long kantri bilong em.

Em i pilim ples i hat na tuhat i pundaun na em i no save long wanem samting em bai mekim.

Tasol i no longtaim, em i go long haus pater na bruda bilong ol Salesian misineri na pilim welkam.

Bihain long dispela em i kalap long wanpela kar na i bihainim Hiritano Haiwe. I no longtaim em i lukim smail na welkam pes bilong ol manmeri na envairomen na i laikim kantri.

Em i go long Kerema na bihain i go antap long Araimiri we ol Salesian misineri i wok.

Ples i bus na i nogat gutpela sevis olsem skul na haus sik i stap bilong helpim ol manmeri.

Em i sori long lukim ol pikinini i mas wokabaut longwe long go long skul na ol manmeri i wokabaut longwe long kisim marasin.

Wanpela samting we i mekim em i ken oltaim tingim PNG em long namel pinga bilong em, ol raskol i katim taim ol i ran long Hiritano Haiwe i go bek long Galp.

Tasol dispela i no mekim em i wari bikos em i bilip yet olsem PNG i gutpela ples bilong stap.

Em i tok gutpela menesmen long ol risos bilong kantri i ken lukim ol manmeri i ken gat gutpela sindaun long bodi na long spirit.

Em i sori long lusim kantri tasol i tok sapos em laik bilong God, em bai kam bek long kantri long sampela taim bihain.