OL Evanjelikal Luteran Sios (ELC) PNG i sori na tok gutbai long longtaim pasto bilong ol, Londi Saiwong long pinis bilong las mun.

Dispela Pasto em Londi Saiwong husat i bin wok long St Barnabas ELC sios, 10-Mail ausait long Lae long 8-pela krismas.

Ol bilip manmeri i tok Pasto Saiwong i save wok strong na strongim bilip bilong ol manmeri long kongrigesen na go bilong em i bikpela lus long ol.

Tasol ol i tok maski em i tok, ol bai i no inap lus tingting long ol gutpela skul em i bin givim long strongim bilip bilong ol.

Siaman bilong St Barnabas Peris Peter Kunjil i tok gutpela wok bilong Pasto Saiwong i lukim planti senis long kongrigesen we i lukim namba bilong ol yangpela husat i save mekim hombru na smuk spak brus na kamapim ol hevi bilong lo na oda i go daun.

Ol famili we i gat hevi, kros pait na bruk i go daun tu.

Kunjil i tok dispela i lukim tu namba bilong ol manmeri husat i pas long wok bilong sios i go antap.

Em i tok wok bilong Pasto Saiwong i lukim i gat gutpela wok bung wantaim ol arapela sios olsem Katolik na Seven De Edventis.

“Miprla ol Kristen bilong peris na 10-pela kongrigsen i lukim planti senis na gutpela sindaun i kamap bikos long gutpela wok bilong Pasto Saiwong,” Kunjil i tok.

“Pasto Saiwong i wok strong wantaim ol Sande Skul i go inap long ol bikpela manmeri.

“Bilip bilong ol manmeri i kamap strong na ol komyuniti i stat long sindaun gut.”

Kunjil i tok Pasto Saiwong i no save sindaun tasol olgeta taim i save go bungim ol famili taim em i gat taim.

Long wankain taim Reveren Awong Zawie Sandrie, Het Bisop bilong ol kongrigesen long Lae Distrik i tok tenkyu long sapot bilong ol manmeri na i tok Pasto Saiwong i lusim ol tasol ol i mas holim ol gutpela skul em Pasto Saiwong i bin skulim ol.

“Yupela i no ken lus tingting long dispela ol gutpela skul tok em yupela i kisim pinis,” em i tok.

“Yupela i mas holim strong na bihainim dispela ol skul tok long laip bilong yupela.

“Bikpela samting em yupela i kisim pinis gutpela skul na nau em i taim yupela i mas bihainim na skulim ol arapela long skruim Kingdom bilong God.”

Reveren Sandrie i rilisim tu Pasto Saiwong long em i fri na i ken go wok long narapela peris.

Pasto Saiwong i tok i tru em i go tasol God i stap bilong strongim bilip bilong ol.

Em i askim ol long pas olgeta taim wantaim God long laip bilong ol.

Paulus Tali i raitim