Dispela em Esther Vicky Kave o ol i save kolim em Estapacifica. Em bilong Erave long Sauten Hailans provins na Asaro long Isten Hailans Provins.

Em dispela meri husat i save singim Mangi West Papua long Tokples bilong West Papua na tok pisin. Nek bilong en i save kam gut tru na musik bilong en tu i stap long narapela mak. Dispela singsing bilong en i stap long namba wan mak long top 20 singsing insait long kantri i no long taim i go pinis.

Long Sarere avinun, em i tokaut gen long namba tu singsing bilong en “Gomohane” long tokples Dano long Asaro na tok pisin. Ol manmeri long sosel midia i mekim planti gutpela toktok long dispela singsing na ol i laikim tru nek bilong Esther.

Ol i tokaut olsem Estapacifica i karim musik long PNG i go long narapela mak.

Em i bin kamap long PNG tasol em i kamap bikpela long West Papua. Em na ol famili bilong en i bin i go stap long West Papua bikos mama na papa bilong en i bin i go long West Papua long mekim wok misin.

Tasol taim bilong ol long stap long West Papua i pinis na nau em na ol famili bilong en i kam bek long PNG na i stap. Nau em i wok olsem Sapot Staf long Pot Mosbi Nesenel Hai Skul long Pot Mosbi.

Rebecca Negere i raitim