Kingsley Tabing em i wanpela yangpela man husat i gat 22 krismas na i kisim namba wan wok ekspiriens bilong en long Wantok Niuspepa bilong Word Publishing Company i no long taim i go pinis.

Yia 2020 em i no gutpela yia tumas long kantri na long wol. Ol planti ogenaisesen na kampani i rausim ol wokmanmeri bilong ol long wok, na tu ol i no moa trenim ol nupela wokmanmeri. Dispela i mekim na ol wokmanmeri na ol lain husat i painim wok i kisim taim.

Tasol, dispela em i no wankain long Wantok Niuspepa bilong Word Publishing Kampani. Insait long dispela taim nogut, Wantok Niuspepa i no rausim wanpela wokman, nogat. Na Wantok Niuspepa i go het long trenim dispela nupela wokman maski taim nogut.

Long dispela taim, Wantok Niuspepa i bin trenim Kingsley Tabing long wok olsem Grafik Disaina. Dispela em i namba wan wok bilong Kingsley bihain long em bin greduet long Pot Mosbi Bisnis Kolis long 2019.

Kingsley i bin amamas tru long dispela sans we i kamap long laip bilong en.

“Mi no bin ting olsem dispela kain samting bai kamap long mi na tu em i sans bilong mi long wok wantaim ol save lain na ol lain i gat kainkain pasin na stail,” Kingsley i tok.

Kingsley i mekim dispela tok insait long wanpela pas we em i raitim i go long Edita bilong Wantok Niuspepa Rosa Koian long tok tenkyu long en long givim em dispela sans long lainim long wok olsem Grafik Disaina long 3-pela mun.

“Em i namba wan taim bilong mi long wok, na em i sans bilong mi long kisim ekspiriens long laip bilong mi. Dispela i bai helpim mi long nau na long bihain taim long wok na long laip bilong mi tu.

“Mi bin lainim planti samting tru aninit long lukaut bilong Edita Koian na ol wok em i givim mi long mekim long wan wan de long wik,” Kingsley i tok.

Kingsley i tok, maski taim bilong en long kisim wok ekspiriens wantaim Wantok Niuspepa em pinis, em bai i go het long ridim Wantok Niuspepa long wanem hap em i stap na em i ken salim tingting tasol long hat wok na presa we i save kamap insait long nius rum long kamapim Wantok Niuspepa na salim i go i kam long olgeta hap long Papua Niugini. 

Rebecca Negere i raitim