NOGAT narapela man inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi,” (Aposel 4.12).

Long kisim gutpela laip yumi ken stori olsem, tupela man i sindaun insait long wanpela bot long wara na pulim pis i stap. Wara i sakim bot na i seksek tru. Sori tumas, i no longtaim na bot i kapsait na tupela i pundaun long wara.

Tasol tupela i holimpas yet long bot.

Wara i karim tupela man wantaim bot i go i go na i kamap long hap we wara i kalap bikpela na i go daun.

Tupela man i krai bikmaus na singaut long ol man i kam helpim tupela.

Sampela man i harim singaut na ol i hariap i kam tromoi wanpela rop long wara.

Tupela i lukim dispela rop i kam bilong helpim tupela tasol wanpela i gat gutpela tingting we em i lusim bot hariap na i holimpas dispela rop na ol man i pulim em i kam ausait long wara.

Narapela man i pret long lusim bot na em i no holim rop.

Sori tumas dispela bot i karim em i go inap em i pundaun long hap we wara i kalap na i go daun yet.

Man wantaim bot tupela i bagarap na man i dai.

Taim bot i kapsait rot bilong kisim laip i op long tupela man.

Wanpela i kisim gutpela tingting na em i stap laip. Narapela i no kisim gutpela tingting na kisim bagarap na i dai.

Insait long Baibel Pita i go insait long wara na i singaut long Jisas, “Bikpela helpim mi.” Jisas i putim han na holim em na i pulim em i kam antap (Metyu 14:30).

Yupela i mekim olsem taim hevi i kamap, yupela i ken singaut long mi, na bai mi helpim yupela na yupela i ken litimapim nem bilong mi,” (Buk Song 50:15).

Mipela manmeri i wankain tasol. Sampela i ting, sapos ol i taitim bun long stap gut, dispela em inap helpim ol long go long heven.

Sampela i ting sapos ol i go long lotu na ol i kisim baptais na komunio, dispela em rot bilong helpim ol long kamap long gutpela ples bihain.

Ol i wankain olsem dispela man i holim bot i kapsait pinis na i go daun long ples nogut.

Satan i save bosim dispela bot bilong ol.

Tasol ol manmeri i singaut long Jisas, ol i wankain olsem dispela man i holimpas rop.

Jisas tasol inap long bringim yumi long heven,

Hatwok bilong yumi i no inap, olsem na Jisas i tok, “Mi yet mi rot na mi as bilong laip. I no gat wanpela man inap i kam long Papa long narapela rot. No gat. Long mi tasol,” Jon 14: 6.