NO ken pret long kain kain traim na hevi, Reveren Garo Kilagi, Jeneral Seketari bilong Yunaitet Sios long Papua Niugini i tok.

Em i tok manmeri i no ken pret long bungim ol salens long laip bikos Jisas, husat i Sevia na winim olgeta traim inap helpim yumi long winim.

Em i tok bikpela samting em yumi manmeri i mas i gat bilip na tras long em.

Em i mekim dispela tok long taim sios i redi long holim enuel jeneral miting (AGM) bilong em long Hela rijon long Novemba bihain long dispela yia.

Em i mekim dispela tok tu long Wantok Niuspepa long taim kantri na wol wantaim i wok long bungim planti salens na hevi long kamap bilong coronavirus (COVID-19).

“Yumi i no ken tingting planti na pret long ol traim na hevi i kamap,” Reveren Kilagi i tok.

“Bikos Bikpela Lord yet i tok olsem em bai helpim yumi.

“Bikpela i winim olgeta traim, maski sapos dispela i min pen na dai, yumi i mas gat bilip na tras long em long olgeta taim.”

Het tok bilong AGM i stap long Baibel rit long Buk Song 46:10 “... Yupela i mas save gut long mi, mi God tru. Mi antap tru na ol lain manmeri is tap aninit long mi. Long olgeta hap bilong graun, mi stap nambawan tru.”

Bihainim dispela tok Reveren Kilagi i strongim tingting bilong ol manmeri olsem wantaim grasia bilong God, manmeri inap winim ol kain kain traim, birua na hevi.

Em i tok sios i laik holim AGM long Hela bikos sios i bilip rijon i laikim gutpela luksave long dispela taim.

Em i tok planti manmeri long rijon i gutpela na i no nogut olsem ol arapela i ting.

Em i tok sios i laik bai manmeri long rijon i mas luksave long laik bilong God, senisim pasin na kisim Jisas long laip.

Em i tok sios bai toktok tu long ol hevi na salens em i bungim long dispela taim na painim ol rot long stretim.

Reveren Kilagi i tok ol bai toktok long ol sosel isu olsem hom bru, spak, drag (spak brus), famili, soseri akusesen riletet vailens (SARV), jenda bes vailens (GBV) na helt na edukesen.

Em i tok inap long 50 deligesen bai kamap long AGM bihainim oda bilong Kontrola bilong Nesenel Pandemik Respons na Polis Komisina David Manning.

Em i tok long ol pastaim bung moa long 100 delegesen husat i kam long olgeta rijon long kantri i save kamap tasol dispela nau bai i no inap kamap.

Paul Zuvani i raitim