POT Mosbi Asdaiosis i givim toksave olsem ol peris i ken go het long holim bung lotu long ol haus lotu long daiosis.

Sir John Kardinal Ribat, Asbisop bilong Pot Mosbi i givim dispela toksave bihain long em i givim toksave long las mun long pasim ol bung lotu bikos long hevi bilong coronavirus (COVID-19).

Tasol em i tok namba bilong bung i no ken moa long 50 na ol manmeri i mas sindaun long ol spes em ol i makim long fom o sia.

Em i tok bihainim Oda long Nesenel Pandemik Respons Kontrola na Polis Komisina David Manning olsem manmeri i mas sindaun 1.5 mita longwe long narapela.

Long wanpela pas em i salim long ol bilipmanmeri em i tok, “Mi laik tok olsem ol sios i ken go het long holim ol bung lotu tasol i no ken moa long 50.”

“Mipela i gat namba bilong dispela sik i wok long kamap bikpela long Nesenel Kapital Distrik na ol arapela hap bilong kantri.

 “Ol manmeri i mas sindaun 1.5 mita longwe long narapela.”

Kardinal Ribat i tok gen olsem manmeri i mas stap wantaim rispek na pasin bilong laikim olsem ol i mas tingting gut long was long ol yet na ol arapela long ol i no ken kisim COVID-19.

Em i tok long ol lain husat i no inap go lotu em i askim ol long mekim tupela prea long strongim bilip bilong ol.

“Dispela ol prea em long Singaut i go long taim bilong sik na prea i go long Santu Michael, Was Angelo bilong Papua Niugini.”

Kardinal Ribat i tok Asdaiosis i sapotim wok bilong Gavman long daunim kamap bilong COVID-19 na olsem em i askim ol pater long ol liklik haus lotu long ol i no ken i gat moa long 50 manmeri.