IVANJELIKAL Luteran Sios (ELC) PNG i bin holim wanpela simposium o bung long mekim wok painim long autim Gutnius long ol siti na taun.

Dispela bung i bin kamap long ELC het opis long Ampo, Lae long 20 Ogas.

Ol saveman bilong sios i bin kamap na toktok long painim ol nupela rot  we i go wantaim ol senis long sosaiti long autim tok bilong God.

Dispela i lukim tripela bikpela tisa bilong Martin Luther Seminari ausait long Lae Siti i bin kamap na helpim long givim tingting.

Ol tisa em Reveren Gerrie Sunga, Reveren Samson Koi na Reveren Gigmai Okuk.

Wanpela salens ol i bin tokaut em long hevi bilong mani na ol rot ol liklik manmeri i mekim long kamapim mani na sapotim ol yet long ol taun na siti.

Ol i tokaut tu long ol salens em wan wan ol sios lida olsem diken na ol pasto i save bungim.

Ol i tokaut olsem ol pasto bai stap olsem ol wasman bilong ol sipsip olsem ol i mas stap olgeta taim wantaim ol bilip manmeri na strongim bilip bilong ol.

Long dispela Reveren Sunga i tok long Papua Niugini, eben ministri i stat pinis bihain long 1945, bihain long Wol Woa II.

Em i tok ELC bung long Raipinka, Goroka distrik, Isten Hailans long 1966 i givim stia na i makim Lae na Madang  olsem ol senta bilong kamapim ol pailet projek.

Dispela long soim rot bilong wok misin insait long ol taun.

Pastaim sios i painim graun bilong mekim wok, na taim sios i kisim graun, sios i gat sans long sanap antap long em na kirapim wok misin.

"Straksa bilong sios long dispela taim i olpela na laikim senis,” Reveren Sunga i tok.

“Ol man i yusim dispela straksa long kisim helpim na kisim biknem bilong ol, na dispela i kamap hevi bilong autim Gutnius insait long sios.

Em i tok wok ministri bilong yumi long kain kain lotu i wok long kirap em i pundaun gen na wok misin insait long ol gavman sistem, ol kampani na pablik sevis tu i pundaun na sios i lusim ol planti memba long dispela rot.

“Sios i lusim wok mak bilong en long Renbo program bilong autim Gutnius.

“Ol arapela sios i yusim gut, na sios i kamap gut long sait bilong Relijen edukesen, sios i go daun na stat wantaim ol pikinini.”

Sanang Zazoring i raitim