Don Bosco Technical Institute (DBTI) i go pas long lukautim envairomen long dispela yia maski hevi bilong COVID-19 i kamap i stap.

DBTI i luksave olsem i gat nid long lukautim gut ol pipia bilong ol na ol i laik ol komyuniti i stap klostu long ol i helpim ol.

Ol i laik long lukautim ol pipia bilong ol bikos ol i laik long lukautim envairomen long soim olsem ol i gutpela sitisen.

Ol i bin kisim dispela tingting bihain long Pater Angel Artime, Rekta Mesa bilong Salesian Sosaiti i makim het tok bilong dispela yia olsem “Gutpela Kristen, Gutpela Sitisen”. Pater Angel i strongim ol long lukautim gut envairomen long kamap gutpela sitisen.

Antap long dispela tingting ol i kamapim wanpela projek ol i kolim Zero Waste o no gat pipia.

Insait long dispela projek, ol i baim ol basket bilong putim pipia ol i kolim wili-bin, ol i bungim pipia long wan wan wik, ol i digim tripela bikpela hol bilong putim ol pipia long baksait long skul, ol i dikim tupela hol long haus bilong Salesian na narapela tupela hol long haus bilong ol wokmanmeri tu long putim ol pipia.

Tasol ol i no stop long dispela. Ol i go yet na sekim gen wanem pipia ol i bungim na ol skelim i go i kam gen long wanem pipia bai sting hariap na wanem pipia bai no inap sting hariap. Ol i gen painim rot long wanem ol i ken mekim long ol pipia we i no inap long sting.

Dispela em ol sumatin na ol wokmanmeri bilong DBTI i mekim. Ol i gat tingting tu long bringim ol arapela tu i kam insait long luksave long dispela na mekim wok long lukautim envairomen.

Rebecca Negere i raitim