OL MERI long Yunaitet Sios i amamasim 49 Yunaitet Sios Felosip long Papua Niugini long las wik.

Yunaitet Sios long Papua Niugini na Solomon Ailan Sios Yunion i bin kamap long 19 Janueri, 1968.

Yunaited Sios Wimen Felosip i bin stat long 23 Oktoba, 1971 long Malaita Yunaitet Sios Kongrigesen.

Long dispela taim, Susan Setae i bin gat 25 krismas na i wanpela tisa long Yunaitet Sios Kristen Edukesen Trening Senta long Malmaluan, Is Nu Briten.

Long dispela taim ol i bin askim em long givim toktok long Baibel Stadi long Gutnius bilong Jon 10: 10 we Jisas i tok, “Stilman i no save kam bilong narapela samting. Nogat. Em i kam bilong stilim ol sipsip na bilong kilim ol i dai na bagarapim ol. Tasol mi, mi kam bilong ol i ken kisim laip, na bilong laip i ken pulap tru long ol.”

Setae i tok tenkyu long God olsem taim em i lukluk bek, ol lidameri long Yunaitet Sios (Methodist) na Papua Ekalesia bai bung na mekim disisen long laip bilong ol meri long sios.

Dispela em i wanpela taim we mi i no inap long lus tingting na dispela bai stap long tingting bilong mi olgeta taim.

“Tude, ol meri long Yunaitet Sios long Papua Niugini na Solomon Ailan i wok long amamasim 49 anivesari, sampela ol meri lida i stap yet long dispela taim,” Setae i tok.

“Mi amamas na tok tenkyu long God long lidasip we i givim tok tenkyu long mi.

“Mi save namba wan Melanesia Modereta Marama Hazel Boseto i stap gut yet long ailan bilong em long Choisel long Solomon Ailan.”

Em i tok tude ol meri i amamasim 49 krismas anivesari.

“Mi tok tenkyu long yu susa Hazel, long nau mi gat bilip na inap long mekim ol samting long laip.

“Yu givim mi rum long mi ken gro, kamap bikpela na kamap namba wan Yunaitet Sios Wimen Program Seketeri long 1986 i kam inap long 1996.”

Em i kisim luksave tu long kamap memba bilong UCWF 50 yia anivesari komiti na lukluk long dispela selebresen.

Em i tok tenkyu tu long Marama Wendy Siai, Presiden bilong nupela UNWF na long askim em long kamap Seketeri bilong UCWF Desk Program Seketeri.