NUPELA Mary Help bilong ol Kristen peris long Rapolol, Is Nu Briten i amamasim namba wan anivesari bilong em long tupela Sande i go pinis.

Dispela peris em ol lain Salesian husat nau i ranim. Ol Salesian i save ranim ol Don Bosco skul.

Sampela ol komyuniti olsem Don Bosco skul, Palnakaur, Pamale, Tobera, Malagunan, Nordup, Bitagalip Livuan na Assing em peris nau i lukautim i bin kamap na amamasim de.

Peris i amamasim anivesari long tingim tu mama karim de (DOB) bilong Don Bosco, faunda bilong ol Salesian misineri.

Wantaim dispela ol i tingim tu pinis wok bilong Asbisop Francesco Panfilo husat i ritaia long wok misin bihain long em i gat 76 krismas na i mas ritaia.

Ol manmeri i amamas na kisim dispela taim long tok tenkyu tu long asbisop long go pas long ol long bilip bilong Katolik Sios long asdaiosis.

Long dispela de peris i lukim 121 yangpela mangi na meri i kisim Sakramen bilong Konfameso na 6-pela bikpela manmeri i kisim Sakramen bilong Baptais na 11 i kisim namba wan Komunio.

Ol lain husat i save helpim ol Salesian i kisim dispela taim tu long rinuim tok promis bilong ol long wok bilong ol.

Asbisop i tokim ol manmeri long lotu long ol i mas oltaim lukluk long Bikpela long kisim strong na wokabaut long bilip bilong ol.

Em i tok taim ol manmeri i amamas long laip ol i gat long em, tok tenkyu long tu long dispela laip em Bikpela i givim.

“Tok tenkyu long Lord long laip, long bilip, long ol sakramen na olgeta samting yumi i gat long laip,” Asbisop Panfilo i tok.

“Mipela i no inap stap sapos em i no mekim dispela ol samting na yumi long namba wan taim.”

Asbisop Panfilo i amamasim dispela de long makim 56 anivesari bilong em long stap olsem Salesian.  

“Mi askim yupela long askim tu Bikpela long wok na plen em i gat long laip bilong yupela olsem yu ken bihainim em.”

Moise Paluku i raitim