OL pipel bilong Sasaura, Gadsup LLG, Obura-Wonenara distrik, insait long Isten Hailans, i lukim bikpela senis insait long komyuniti taim ol i bihainim tok lukaut bilong gavman na tu, bihainim Tok bilong God.

Ol i laik stopim ol pasin olsem hom bru (paia wara), mariwana, pilai kas na ol arapela pasin nogut.

Klostu 500 manmeri i bin kamap long wanpela wok lotu long mun i go pinis long tokaut long disisen bilong ol.

Ol i mekim Baibel stadi long dispela prea wik.

Planti Luteran memba bilong Onaninka kongrigesen i kamap long dispela holi wik bung.

Dispela wiki  kamap long 26 Julai, 2020 we ol memba i kisim ol Sakramen olsem baptais, konfemesen, marit, na kisim Holi Komunio.

Disisen ol manmeri i mekim i no bin kamap nating.

I bin gat planti tok pait insait long komyuniti na hevi bilong lo na oda i bikpela tru.

Kain sindaun i kamap na manmeri i lukim olsem pasin bilong rispek na stap aninit long gavman i no moa stap.

Ol i gat ol toktok bilong posin na sanguma we ol manmeri i bagarapim laip bilong ol arapela na samting bilong ol.

Dispela i mekim planti manmeri i stap wantaim pret na i no save sindaun gut.

Tasol taim kain sindaun i wok long kamap ol Luteran Kristen bilong Sasaura Namba Wan i lukim bikpela samting God i kamapim insait long laip bilong ol.

Ol i lukim tru bel isi insait long Pikus hauslain na ol lain i stap wantaim amamas.

Dispela i mekim olgeta Luteran memba long Sasaura i tok ol tu i laik senis.

Ol i tok, “Strong bilong Tok bilong God em i namba wan samting i senisim laip bilong mipela.

“Mipela i lukim tru marimari bilong God insait long dispela senis na mipela i bilip tru olsem, God em bikpela samting insait long laip bilong mipela.

“Mipela i save lotu long olgeta Trinde na Fraide nait na bikpela lotu long Sande.

Bilong wanem na ol dispela senis i kamap?”

I gat plant Baibel stadi i kamap insait long hauslain bilong ol na ol i kisim dispela Baibel stadi na mekim wok misin insait long ol arapela ples long helpim ol i mas lukim dispela gutpela senis.

Wanpela bikpela het tok bilong Baibel stadi ol i kisim i go aut em, "God Em i Holi olsem na yumi mas stap holi.”

Dispela i bihainim pasin bilong bihainim Tok bilong God wanpela tasol. Evanjelis Muso Zazoring, i go pas long dispela Baibel stadi na taim ol i harim na bihainim, marimari bilong God yet i kamapim dispela gutpela sindaun.

Moa long 30 pikinini i kisim baptais, 18 yangpela i kisim konfemesen, 3-pela i marit na i kisim Tok bilong God.

Ol i harim Tok bilong God long Gutnius bilong Jon 10:10b we i toktok long laip i pulap insait long Jisas Krais.

Long dispela rit Jisas i tok: "Ol stilman i kam bilong kilim man tasol na bagarapim olgeta samting, tasol mi kam bilong givim laip na dispela laip i pulap tru yupela."

Nau ol i toktok wantaim strong olsem Tok bilong God tasol i save givim gutpela laip long man.

Sanang Zazoring i raitim