PLANTI bilong yumi i laik bai kamap smat na luk nais long ai bilong ol manmeri. 

Long mekim yumi kamap nais na smat olgeta taim,  planti  i laik baim naispela klos, su, trausis na narapela samting moa.

Ol meri bai baim kain kain bilas bilong yau, bilas bilong gras o wokim kain kain stail bilong gras na waswas na klinim bodi long luk gut. Dispela kain pasin em i no bilong wanpela man tasol. Yumi bai bungim planti manmeri i wokim olsem, moa long ol bikpela siti na taun, we manmeri i save bung planti taim long lotu, long bikpela kibung na narapela taim moa.

Em i no samting rong. I no gat rong sapos yumi yusim bikpela mani long baim olgeta ekspensif samting. Manmeri bai les long kam long lotu, sapos ol i lukim pasto o pater bilong ol i no werim gutpela klos, doti o i no luk smat, klos i gat das (doti) na bruk bruk.

Lukluk smat bilong ausait em i wanpela bikpela samting tu long pulim manmeri i laikim yumi na amamas long yumi.

Tasol em i no gutpela sapos yumi tingting long lukautim ol samting bilong ausait, inap ol manmeri i lukluk long ai bilong ol tasol. Yumi mas lukautim o mekim kamap naispela insait bilong yumi tu.

No ken lusim tingting long lukautim hat o bel bilong yumi wantaim.

Gutnius bilong Santu Matyu 23:23-26 i soim olsem ol Farisi na ol saveman bilong Lo i luk naispela tru long ausait bilong ol.

Ol i save putim longpela klos bilong ol i soim olsem ol i gat namba na ol i bikpela man tru. Olsem na maski longwe yet, manmeri bai save, dispela lain em i ol Farisi na Saveman bilong lo.

Ol tu save lusim longpela mausgras bilong ol bihainim pasin na tredisen bilong ol Judaman olsem na long ausait bilong ol i soim olsem ol i no man nating, ol i holiman bilong God na ol i man bilong Lotu.

Tasol sori tumas! Tingting bilong ol i bilong lukautim samting bilong ausait tasol, bikos lewa bilong ol i no go wantaim samting ol i toktok long em.

Olsem na Jisas i tok stret long laip bilong ol Farisi na Saveman bilong Lo.

Bikos ol i tingting tumas long samting bilong graun, long ausait olsem olgeta manmeri i lukim na amamas.

Tasol insait bilong ol i olsem kap na plet we i doti. Ol i save klinim gut ausait bilong en tasol insait bilong em i pulap long pasin stil, gridi na narapela ol pasin nogut.

Kap na sospen bilong ol i kamap naispela bikos ol i save polisim inap long klia stret na i nogat wanpela doti samting i stap.

Tasol insait long kap o sospen bilong ol i pulap long kaikai na drink i no klin. Em i pasin bilong ol Farisi na saveman bilong Lo!

Dispela Gutnius Matyu 23:23-26 em i olsem wanpela bikpela glas o mira bilong helpim yumi wan wan long lukluk na glasim pasin na wokabaut bilong yumi.

Askim bilong yumi yet nau! Rait nau, yumi stap olsem ol lain Farisi na save man bilong lo tu? Bekim i stap long yumi wan wan!

Fr. Paul Liwun SVD