BIKOS long wok bilong ol misineri Papua Niugini i kamap Kristen kantri, Praim Minista James Marape i tok.

Em i tok sapos ol misineri i no bringim Tok i kam long namba wan taim, kantri bai i no inap kamap olsem em i stap nau.

Marape i mekim dispela tok long Ripentens De prea bung long Sir John Guise Stedium long Trinde.

Em i dediketim gen PNG olsem Kristen kantri bihainim tingting ol papa bilong kantri i mekim.

Em i askim tu mausman bilong ol manmeri bilong ol narapela kantri long go bek na tokaut long kantri bilong ol olsem ol i bin stap long wanpela Kristen kantri na PNG i Kristen kantri.

Long 2007 Gren Sif Sir Michael Somare husat i bin stap Praim Minista long dispela taim i tok orait long makim Repentens De.

“Dispela i no Pablik Holide. Nogat. Dispela em i de long tok sori long asua bilong yumi na tok sori long God,” Marape i tok.

“Em i de yumi i mas tok tenkyu long God.

“Tude mi sanap olsem Sif Sevan bilong dispela kantri long givim luksave olsem bikos long God, em nau mi stap.

“Mi givim ona i go long God na givim glori long em.

“Yumi mas givim olgeta samting bilong yumi i go long God bikos long em, olgeta samting i kamap.”

Marape i tok maski kantri i gat planti tok ples na kalsa, long God yumi kamap wanpela kantri.

Em i tok maski sapos yumi kamapim ol helt, edukesen na ol arapela samting, tasol sapos yumi i no givim luksave long God, olgeta dispela samting i samting nating.

Em i tok taim em i tok long kes (curse) pastaim, em i tok long ol manmeri husat i yusim ol pablik samting o husat i bihainim ol rot nogut olsem braiberi long kisim ol samting na dispela tok em i mekim i no go long kantri.

Em i tok PNG i Kristen kantri na bai stap olsem Kristen kantri.

Maski liklik ren long moning na bihainim bikpela san i kamap, planti manmeri no wari na kamap long bung long prea.

Ol arapela Memba bilong Palamen olsem Minista bilong Komyuniti Divelopmen Wake Goi, Minista bilong Trenspot na Infrastraksa William Samb na Memba bilong Pomio, Elias Kapavore na ol arapela bikpela manmeri i kamap long bung long Sir John Guise Stedum.

Paul Zuvani i raitim