POT Mosbi Asdaiosis i givim toksave olsem nogat bung lotu long ol haus lotu long daiosis.
Sir John Kardinal Ribat, Asbisop bilong Pot Mosbi i givim dispela toksave bikos long kamap
na hevi bilong coronavirus (COVID-19).

Long wanpela pas em i salim long ol bilipmanmeri em i tok, “Mi laik tok gen long yumi
wantaim rispek na pasin bilong laikim i mas tingting gut long was long yumi yet na ol arapela
long yumi i no ken kisim COVID-19.
“Mipela i gat namba bilong dispela sik i wok long kamap bikpela long Nesenel Kapital
Distrik na ol arapela hap bilong kantri.
“Olsem hap bilong wok bilong mipela, mi laik tok strong gen long yumi i mas mekim tupela
prea long strongim bilip bilong yumi.
“Dispela ol prea em long Singaut i go long taim bilong sik na prea i go long Santu Michael,
Was Angelo bilong Papua Niugini.”
Sir John i tok Asdaiosis i sapotim wok bilong Gavman long daunim kamap bilong COVID-
19 na olsem em i askim ol pater long no ken holim ol bung lotu we ol manmeri i no ken
kamap.
Ol pater i mas stap long hap bilong ol yet na holim ol lotu na tingim ol manmeri long lotu na
prea bilong ol.
Ol peris na ol haus lotu insait long Mosbi Asdaiosis bai mekim olsem stat long 16 Ogas i go.
Tasol em i tok long 9 klok long olgeta Sande, em i save holim ol lotu we manmeri i ken
bihainim long NBC televisen, NBC Redio na Redio Maria.
Em i askim ol manmeri long joinim em long dispela taim bilong Misa.
Em i tingim olgeta bilip manmeri long ol lotu na prea bilong em.