LAS wik em i bin Intenesenel De bilong Yut na ol yangpela long Lae i bin go aut gen na klinim Lae Siti
wantaim dispela tok ‘No ken tromoi pipia long solwara bilong mipela. Solwara em i laip bilong mipela.

Insait long grup em ol yangpela bilong Luteran, Katolik na Yunaitet Sios.
Long Jun ol Luteran yut long Lae i bin go pas long wanpela bikpela klinaton long Lae siti. Ol i tok Lae em i
no pipia ples.
Ol yangpela i bin wari tru long solwara bilong ol bihain long ol i lainim long planti ol hevi i kamap long
Basamuk solwara long Madang Provins. Ol i wari long wanem maining kampani long Wafi-Golpu i plen
long tromoi ol pipia bilong em long solwara long hap bilong Huon Galp yusim wanpela sistem ol i kolim
Deep Sea Tailings Placements (DSTP).
Ol i tingim gen wokabaut bilong ol las yia long independens de sampela dispela ol yangpela i bin raun
long solwara bilong ol wantaim wanpela toksave. Ol papamama na ol lida long ples Labu i bin raun
wantaim ol na harim bel krai bilong ol yangpela.
“No ken tromoi pipia bilong maining long solwara bilong mipela. Solwara em i laip bilong mipela.”
Wanpela yangpela, Warime Guti, i bin tok, “Sapos yumi larim bagarap i kamap long ol bus, graun na
wara bilong yumi nau, bai yumi tok wanem long ol pikinini bilong yumi long bihaintaim?”
Em i tok moa, “Ating yumi dispela jeneresen i gridi tasol na i no laik tingim bihain taim?”
Ol i bin raun long tupela kanu. Wanpela em Mete Pana na narapela em Mayau Lale. Dispela tupela kanu
i gat wok bilong autim tok bilong lukautim envairomen.
Mete Pana em kanu bilong ol pipel bilong ples Labu long Morobe Provins. Susa bilong em Mayau Lale
em bilong Karkar Ailan long Madang provins.
Ol yangpela long dispela tupela ples i bin go pas long bildim tupela kanu. Insait long wok bilong bildim
kanu ol i harim tok stia bilong ol lida bilong ol, ol i pre planti na askim God long wokabaut wantaim ol
taim ol i autim tok bilong lukautim solwara.
“Basamuk i soim pinis olsem dispela DSTP sistem i ken bruk na planti moa hevi bai i kamap long solwara
bilong mipela. Hamamas moa piksa yumi laik lukim,?” Warime I askim.
Ol i singaut long Dipatmen bilong Envairomen na Konsevesen long stop na tingim gut ol pipel na
envairomen na bihain mekim disisen.

Dispela Sarere ol bai i holim narapela klinaton gen long Lae na husat i laik sapotim ol i welkam long
joinim. Sapos yu laikim T’siot, yu yet baim wanpela grinpela T’siot na ol i ken printim fri bilong yu.

Rosa Koian i raitim