YUMI mas tenkyu long Bikpela long olgeta samting.
Em i no larim ol birua i pinisim yumi. Yumi i no olsem ol pisin i lusim umben em wanpela man i
bin putim na flai i go.

Dispela umben i bruk pinis na yumi no moa pas na yumi no moa pas long em (Song 124: 6-7).
Wanpela man i wokabaut long rot na i amamas long lukim wanpela pisin i fai i go, tasol pisin i
no flai gut.
Em i flai i go antap liklik na bihain em i pundaun gen. Man i ting pisin i mekim wanem na em i
ran i go long lukluk gut. Tasol wanpela boi i pasim rop long lek bilong pisin na holim stap. Em i
larim pisin i flai i go liklik na bihain em i pulim pisin i go bek wantaim rot. Boi i no sori liklik
long pisin.
Dispela man i sori long pisin na em i go askim boi olsem: “Bilong wanem na yu wok long
mekim dispela pasin nogut long pisin?”
Boi i no sem liklik long pasin nogut em i wok long mekim long pisin na em i bekim wantaim
bikmaus, “Maski long mekim planti toktok. Em pisin bilong mi. Papa bilong mi i lukautim planti
pisin na em i givim mi dispela pisin long mi ken holim na pilai wantaim.”
Man i sori long pisin na em i go long papa bilong dispela boi na i askim em long baim dispela
pisin long boi. Dispela man i givim mani na i kisim dispela pisin i go.
Kwiktaim em i rausim rop long lek na larim pisin i stap fri na pisin i flai i go antap long skai, em
i no moa stap kalabus.
Satan tu i save holim ol manmeri na pasim ol long strongpela rop bilong en na i tokim ol olsem,
“Mi gutpela bos bilong yupela. Yupela i no ken bihainim tok bilong God. Yupela i ken stap fri na
bihainim laik bilong yupela yet.”
Tasol nogat. Man i ting em i stap fri na em i laik flai i go olsem pisin. Tasol oltaim Satan i pulim
em i kam bek gen long strongpela rop bilong em.
Satan i pilai long man na lap tasol na i amamas long kalabusim ol man. Man i no wanpela i stap
fri sapos em i stap long han bilong Satan. Nogat tru.
Wok bilong Satan em long pulim ol kalabusman bilong em i go daun moa na olsem ol bai stap
wantaim em long hul i gat paia i no save dai.
Baibel i tok: “Tasol God i bin baim bek yupela na tekewe yupela long ol dispela pasin. Na em i
no givim ol samting bilong graun i save bagarap olsem silva na gol bilong baim bek yupela.
Nogat. Em i baim bek yupela long blut bilong Krais,” (1 Pita 1:18-19).
Jisas i no baim yumi long mani na kago bilong dispela graun. Olgeta mani bilong dispela graun i
no inap baim bek yumi. Jisas i givim laip bilong em yet na em i dai long diwai kros long kisim
ples bilong yu. Jisas i brukim rop pinis. Nau rot i op long yumi i ken go fri.
Sapos yumi kam long Jisas em bai mekim yumi i kamap fri olsem Baibel i tok. Sapos pikinini i
mekim yupela i kamap fri, orait yupela i stap fri tru (Jon 8:36).