EVANJELIKAL Luteran Sios (ELC) PNG Gutnius Dairekta, Pasto Forenuka Bomai i bin salensim ol meri long stap olsem ol diwai i karim gutpela kaikai we ol i no inap katim na tromoi long paia.

Pasto i tok tude i gat tupela kain manmeri i stap long dispela graun. Wanpela i man bilong tok tru na narapla em man bilong giaman.

Em i mekim dispela tok long taim Kagai Luteran Seket long Yongumul LLG, Sinasina Yongumul distrik, Simbu Provins i holim 36 ELC meri konprens long las wik.

Em i autim tok long Gutnius bilong Mathew 7:16-20, we i salensim ol meri long ol i soim gutpela lidasip long laip bilong ol, famili, peris na lokal komyuniti bilong ol.

Inap long 235 meri long 19 seket olsem long Wabo long Galp provins), Middel Ramu (Madang), Morobe, Isten Hailans, Jiwaka, Westen Hailans, Enga na Simbu yet i bin kamap.

Dispela ol lain i bin stap insait long kisim save long wok ol i gat long mekim insait long komyuniti, sosaiti na sios bilong ol. Ol i mas bihainim tok ol i mekim long “6-pela pinga long han.”

Reveren Apa Dilu, ELC Simbu Presiden i strongim tingting bilong ol meri long sanap strong long bilip bilong ol.

Em i tok Jisas Krais yet i rot na manmeri i bihainim Jisas i no inap long paul long mekim wok.

Agnes Gabee Kodineta bilong koprens i amamas long ol meri na i tok pasin bilong ol meri Simbu i lukim ol i kamapim Risos Senta bilong ol meri long seket.

Em i tok insait long wok bilong ol, ol meri i lainim pasin bilong gutpela haijin long stap klin, long rit na rait, pasin bilong stap klin, kuk, lain long musik na ol pasin bilong lotu na singsing.

Em i askim ol long bihainim laip na pasin em ol namba wan Kristen i bihainim (Aposel 2: 42-47).

Em i tok wok ol meri i mekim em ol i mas larim Jisas husat i Sevia bilong ol i mas go pas long ol long mekim.

Ol meri i bin askim lokal Memba Kerenga Kua long go tasol em i no inap long go na Sif Ekseketiv Opisa bilong em, Kerenga Joe i bin makim em na kamap long konprens.

Em i makim maus bilong Memba na i strongim tingting bilong ol meri olsem Memba i gat tingting long ol na bai sapotim ol long wok ol i mekim.

Paulus Tali i raitim