PATER Jozef Pekala, CSMA bilong Rukus “Divine Mercy Shrine” peris i bin amamasim 25 yia anivesari bilong em long Mt Hagen Asdaiosis i no longtaim i go pinis.

Rukus “Divine Mercy Shrine” peris i stap long Not Waghi Dineri long Jiwaka.

Asbishop Douglas Young, bisop bilong Mt Hagen Asdaiosis i bin go pas long selebresen.

Em i tok dispela taim Kristen bilip i bungim planti salens na wok misin i bikpela samting long laip bilong manmeri.

Em i tok wok misin i wok manmeri i mekim bihainim singaut bilong God long laip bilong ol.

Em i tok wan wan manmeri i mas wok hat long strongim bilip bilong ol yet.

Bisop Young i tok Pater Pekala we i bihainim singaut bilong Jisas long laip i mekim sakrifais long lusim famili na kam wok long narapela kantri.

Em i tok Pater Pekala i helpim long bringim tok tasol em wok bilong wan wan bilip manmeri long kisim dispela tok na bihainim.

“Taim yupela i kisim baptais, em yupela i kamap pikinini bilong God,” Asbisop Young i tok.

“Ol misineri i bringim tok long yupela tasol yupela yet i mas strong na soim olsem yupela i kisim Jisas long laip.

“Dispela i min olsem yupela i mas bilip, ritim Baibel, pre na mekim ol gutpela pasin long strongim bilip.”

Em i tok tenkyu long Pater Josef Pekala long harim singaut bilong Jisas long go na strongim Tok long Asdaiosis na kantri.

Em i tok tenkyu long God long strongim Pater Jozef long wok bilong em.

Stap tu long dispela selebresen em Vika Jeneral Pater Bogdan Swierczewski CSMA.

Pater Jozef i bilong Grybow Krakow, Saut Poland.