BILIP long Jisas tasol inap daunim bilip em manmeri i gat long tingting bilong sanguma, Donald Lippert, Bisop bilong Mendi Daiosis long Sauten Hailans na Hela i tok.

Em i tok i no gat narapela rot em manmeri inap long lusim dispela tingting inap ol i bilip olsem Jisas wanpela tasol i lida bilong spirit.

Em i mekim dispela tok long taim Daiosis i wok long redi long holim wanpela protes mas egensim ol pasin nogut egensim toktok bilong sanguma o Soseri Akusesen Vailens (SAV).

Dispela de i save kamap long 10 Ogas long wan wan yia.

Bisop Lippert i tok planti laip long Papua Niugini i lus bikos long sanguma na Mendi Daiosis i no narakain.

Em i tok long makim de ol lidaman na ol lain husat i bungim kain hevi bai kamap na givim tokok, na ol bai kamapim sampela pilai long soim kain sindaun we i save kamap long komyuniti.

Sentral Dineri bai go pas long dispela de.

“Ol hevi i pas long toktok bilong sanguma i kamap yet. Planti komyuniti i givim luksave long kain bilip long stap na pasin long kamap,” Bisop Lippert i tok.

“Tasol i no gat wanpela man o ogenaisesen i traim long pasim kain bilip na pasin nogut.

“Mipela ol Kristen i mas kirap na stap olsem lait long daunim dispela pasin nogut.

“Bilip long Jisas wanpela tasol inap long daunim bilip manmeri i gat long sanguma.”

Sista Lorena Jenal, Franciscan Sista bilong Divain Providens long Mendi Daiosis i go pas long grup long daunim bilip long sanguma na em bai go pas long dispela protes long 10 Ogas.

Em i tok Daiosis i kisim helpim long Missio-Aachen, wanpela NGO grup, long kamapim Haus bilong Hop (House of Hope) bilong ol lain husat i bungim dispela hevi long go na stap.

Em i tok dispela haus i bilong ol i stap hap taim na bihain ol manmeri i go bek long komyuniti bilong ol o long hap we ol save ol bai stap seif.

Bisop Lippert i tok daiosis i kisim sampela wik pinis long mekim awenes long ol manmeri i save long hevi bilong tok bilong sanguma.

Em i tok tu olsem daiosis i mekim awenes tu long daunim kamap bilong coronavirus (COVID-19) na Afrika Swain Fiva (ASF).

Paul Zuvani i raitim