LONG de 4 Ogas olgeta yia, Katolik Sios i save amamasim Pestode bilong Santu John Vianny, wanpela holi pater taim em i mekim wok misin bilong em. Em i kamap Was Santu bilong olgeta Daiosisan Pater.

Long dispela yia, pestode bilong em i kamap long Tunde dispela wik. Rit bilong lotu em Matyu 15: 1-2 +10-14. Stori bilong Farisi i gat bel hevi bikos disaipel bilong Jisas i no wasim han bipo long ol i kaikai.

Long Santu Misa, mi bin mekim dispela stori long ol manmeri i kamap lotu long moning.

Stori i kamap long wanpela peris long taim bilong lotu long Sande. Bihain long ritim gutnius, pater i givim skul. Olgeta i sindaun na harim gut skul.

Em i tok: “Long wanpela lotu pater i givim skul tok i stap. Wantu tasol, man i save paitim musik kibod i tasim kibod na mekim nois. Olgeta kwaia manmeri i kirap nogut tru.

Pater i go het wantaim skul bilong em na i tok: “Brata susa sapos yu kam long lotu, pre, singsing na harim skul bilong pater tu ya? No ken pilai pilai olsem man paitim musik kibod bilong yumi. Olgeta i wok long harim skul, na kibod man i go het long paitim ki bilong musik. Musik na kibod i no nambawan samting long taim bilong lotu.”

Planti manmeri i ting olsem, sapos lotu i kamap naispela na amamas, sapos i gat naispela kwaia na musik long taim bilong misa, dispela i nambawan samting. Yu ken singsing, amamas wantaim musik na gita, kibod o narapela instramen bilong musik, tasol ol i no nambawan samting bilong lotu. Sampela manmeri i no save go lotu bikos i no gat manmeri i pilai musik, na ol i lusim lotu na i go joinim narapela lotu na lotu wantaim ol.

Sapos wanpela Misa i no gat musik o ogen o kibod na gita, manmeri i no amamas long go lotu. Dispela em i krangki tingting.

Bikos stretpela na trupela lotu em i mas kam long lewa bilong yumi, klinpela hat na strongpela bilip, em i nambwan samting. Maski i gat nasipela musik na singsing long taim bilong lotu tasol lewa bilong yumi i no stap stret na klin, em i mak olsem lotu bilong yumi long Sande o Sabat/Sarere, em i samting nating. Gutpela lotu i mas karim kaikai long gutpela lewa bilong yumi.”

Long Gutnius bilong Matyu 15: 1 – 2 + 10-14 – Jisas i traim hat long soim pasin i stap long komyuniti bilong ol Juda manmeri. Lo bilong ol i gutpela tasol ol i no kisim klia mining bilong bilip. Em i tokim ol Farisi olsem, wanem samting i go insait long bel bilong yumi em i no mekim lewa bilong yumi i doti. Samting i save kamaut long bel bilong yumi i save mekim yumi doti, olsem tingting na tok nogut, pasin pamuk, giaman, stil, jelesi na narapela ol pasin nogut i save kamap long laip bilong yumi.

Yumi ken go long lotu olgeta de o long Sande na Sarere. Tasol sapos pasin bilong yumi long spak, kros, jeles na wokim pasin nogut olgeta taim, em i no soim olsem yumi Kristen manmeri.

Klinpela hat na stretpela tingting tasol i soim sapos prea/lotu bilong yumi i gat mining o nogat. Lotu bilong yumi i gat trupela mining, sapos yumi soim long pasin bilong yumi. Bilip bilong yumi, yumi soim i no long taim bilong lotu tasol. Nogat. Dispela i MAS KAMAP LONG LAIP BILONG YUMI OLGETA DE long pasin na wokabaut bilong yumi. Dispela bai soim olsem yumi trupela disaipel bilong Jisas.****

Fr. Paul Liwun SVD