Daphney Laina em i namba wan soldia meri long Papua Niugini long joinim Papua Niugini Difens Fos Maritime Element.

Em meri long ples Lido long Vanimo Green ilektoret long Wes Sepik Provins.

“Mi joinim PNGDF bikos mi lukim planti manmeri wantaim kainkain save i wok insait long PNGDF na mi save olsem mi tu gat wokmak long mekim sapos mi werim dispela yunifom bilong ami. Mi mas luksave long as o pepes bilong mi,”Laina i tok.

 Laina i joinim HMPNGS Lakekamu olsem sef o kuk long Jenueri 25, 2012.

HMPNGS Lakekamu em i wanpela bikpela sip we Maritime Operations Element bilong PNG Difens Fos i save operetim.

“Mi gat bek graun long bisnis stadi, tasol long taim bilong rikrut trening ol i askim mi long trening long kuk. Mi kisim dispela ofa na sainim 4-pela yia aprentisip long 4 Oktoba 2012. Bihain long sikispela krismas mi kisim save long kuk o Komesal Kukeri,”Laina i tok.

Bikos em bai kamap namba wan meri long joinim nevi em i mas skul longpela taim long akomodesen bilong en long HMPNGS i ken redi.  

“Taim mi stap insait long namba 2 yia bilong trening, bikpela sip HMAS LABUAN nau ol i kolim HMPNGS Lakekamu, i mekim ol haus bilong ol meri na ol i komisinim dispela sip i go long PNGDF Maritime Element olsem HMPNGS LAKEKAMU long 4 Disemba, 2014,” Laina i tok.

Dispela em strongim mi long lainim ol arapela samting tu.

Em i kisim wok olsem Ketaring Komplaiens Menesa long HMPNGS BASILISK. Em i amamas tru olsem em i namba wan sef o kuk meri long stap insait long dispela sip HMPNGS.

“Mi amamas olsem ol wanwok na ol wanskul bilong mi i wok long sapotim mi gut tru,” em i tok.

Em i tok em i save laikim ol kaikai olsem na em i no inap long stopim skul. LCH L33 em namba wan sip we em i bin wok long en. Long dispela hap em i bin lukautim 26 nevi long kaikai.

“Bikos mi wanpela meri tasol, ol dispela man i no save i kam long mi long kaikai tasol, tasol ol i save kam long mi long helpim mi na sampela taim ol i save kam bikos ol i misim susa o pikinini meri bilong ol taim mipela i stap longwe long ol famili bilong mipela.

“Ol olpela wokman bilong solwara i kamap olsem papa, ol yangpela i kamap olsem pikinini man bilong mi na ol wansais bilong mi i kamap brata bilong mi taim mi stap longwe long asples bilong mi,” Laina i tok.

Em i save laikim sip HMPNGS Lakekamu bikos em i save ran isi isi na brukim gut solwara na tu em i gat ples bilong ol meri.