OL manmeri bilong Bogenvil i mas vot wantaim stretpela na kliapela tingting, wanpela pater i tok.

Pater Thomas Tererei, Peris Pater bilong “Our Lady of Mercy” peris long Arawa taun i tok long taim rijon i wok long redi long go insait long rijonal ileksen long neks wik.

Em i tok ol manmeri long ol i no ken paul na vot nating long ol manmeri bikod kendidet i famili memba ol o i wan pisin bilong ol.

Em i tok kain tingting inap mekim ol i vot long rong man we i no inap long bringim divelopmen na senis long ol.

“Bogenvil i laikim ol gutpela lidaman na lidameri husat inap long toktok strong wantaim gavman bilong Papua Niugini long toktok bilong rijon i kisim indipendens,” Pater Thomas i tok.

“Ol manmeri i mas save husat tru i lida tru we inap long makim ol na tingting bilong ol long palamen.”

Pater Thomas i tok tu olsem ol manmeri i mas husat bai i mekim wok tru olsem politikal lida na i no paulim na kamap na wok olsem pablik sevan.

Em i tok wok bilong politisen na pablik sevan i narapela, narapela.

“Wok bilong ol Memba i bilong kamapim ol lo na wok bilong ol pablik sevan i bilong karimaut dispela ol lo o polisi,” em i tok.

“Ol samting i save go krangki taim ol politisen i mekim wok bilong ol pablik sevan na mekim sevis deliveri.

“Ol samting i save paul taim Memba i mekim olsem na wok i no save kamap gut.”

Pater Thomas i tok kain pasin tasol i mekim na sindaun bilong kantri na rijon i no lukim gutpela senis.

Em i tok bihain long 43 yia bilong indipendens, ol manmeri i stap wankain yet wantaim no gat gutpela rot netwok, no gat gutpela helt na edukesen sevis.

Em i tok dispela i soim ples klia kain ol lida ol manmeri i wok long votim long dispela taim.

Pater Thomas i sapotim tu singaut bilong Stet ov Imejensi Deputi Kontrola na Deputi Polis Komisina Francis Tokura i askim ol manmeri long bihainim tok olsem ol i no ken kisim sik coronavirus (COVID-19).

Em i tok taim ol manmeri i harim tok, ol i no inap dai bikos long COVID-19.

Paul Wagum i raitim